Nagkanayon si Bay Area Dragon 7’5” center Liu Chuanxing nga aduna siya’y nakat-unan nga leksyon sa iyang pagpakigparang kang San Miguel Beermen 6’10” center JuneMar Fajardo sa semi-finals series sa Philippine Basketball Association (PBA) Commissioner’s Cup.
Usa sa mga dili malimtan ni Liu mao ang senaryo sa Game 2 sa best-of-five series diin aksidenteng naigo sa siko ni Fajardo ang iyang baba nga maoy hinungdan nga nahingo ang iyang ngipon sa atubangan.
Human sa duwa, nagpa-checkup sa denstista si Liu. Naggamit na og mouth guard ang Chinese big man sa nagsunod nga mga duwa sa series diin midaog ang Dragons, 3-1.
Gitataw ni Liu nga wala ra niya hatagi og gibug-aton ang nahitabo tungod kay nasayod siyang aksidente ra ang tanan.
Gipasabot ni Liu nga dihang nasayran niyang moduwa sila sa PBA isip guest team, naghinamhinam na siyang makigparang kang Fajardo.
Matod ni Liu nga nabantog na ang six-time PBA MVP sa tibuok Asya isip usa ka dekalidad nga sentro.
Sa elimination round, wala nahitabo ang gihandom ni Liu gumikan kay wala nakaduwa si Fajardo tungod sa angol niini sa tutonlan.
Dako ang kalipay ni Liu dihang nibalik na pagduwa si Fajardo ug nagkrus ang dalan sa Dragons ug Beermen sa semi-finals.
Nagkanayon si Liu nga nakabenepisyo siya sa pagpakigparang sa Sugboanong higante ug ang leksyon nga iyang nakat-unan magamit niya sa umaabot.