Karong adlawa maoy unang adlaw sa atong pagsugat sa tuig 2023, ang tuig nga atong gipanghinaot nga makabulig ug makahatag og mga grasya ug kaayohan sa dagan sa atong kinabuhi.
Atong hingpit nga talikdan ug ibutang sa kalimot ang mga bati nga nasinati ug ato kining himoong leksiyon nga mogabay sa atong dalan paingon sa unahan.
Sa natad sa paugnat sa kusog, atong lakbitan ang mga panghitabo sa tuig 2022.
Kining tuiga, nagkulit og handumanan sa atong alimpatakan nga lisod papason gumikan kay kini maoy nag-abli sa mga kalihukan sa sports human sa duha ka tuig nga kamingaw gumikan sa pandemya nga miigo sa tibuok kalibutan.
Sa paghibalik niini, wa kalikayi ang managlahing epekto nga gikasaw-an sa atong mga atleta.
Dunay mga anino nga naghubit og negatibong reaksiyon gumikan sa hataas nga paglurang apan aduna usay pipila ka mga nakabenepisyo.
Sa 2023, ang entrada sa professional boxing nag-atubang og dakong hagit. Kini gumikan kay ang tuig 2022 napupos nga walay bisan usa nga gibilin nga world champion.
Niadtong Hulyo, si kanhi WBC world featherweight king Mark Magsayo maoy katapusang Pinoy world champion nga natangtangan sa iyang bakus sa dihang gipildi kini ni Rey Vargas sa Mexico.
Hinuon ang maong titulo nalangkat ni Magsayo sa buwan sa Enero 2022 human niya pakaging ang American world champion nga si Gary Russel.
Sa Mayo 4, si Casimero gitangtangan sa iyang WBO bantamweight title human nga wa tugoti sa British Boxing Board of Control nga makadepensa sa iyang titulo batok sa British challenger nga si Paul Butler, gumikan kay nakalapas kunohay kini sa pagtibhang sa iyang timbang pinaagi sa sauna bath.
Sa sayo pa, tagsa-tagsa usab nga gilangkatan sa ilang titulo sila si Rene Mark Cuarto, Nonito Donaire ug Jerwin Ancajas.
Si Cuarto, kanhi IBF minimumweight king, napukan sa hometown boy nga si Daniel Valladares (split decision) samtang si Donaire, nga napildi ni Naoya Inoue sa ilang unification bout, misuway unta pagkuha og balik sa bakus apan gi-knockout na hinuon siya sa ikaduhang round niadtong Hunyo 22.
Mao usab kini ang nahitabo ni Ancajas kinsa nakahupot sa titulo sulod sa hataas nga panahon sa wala pa kini mapukan ni Fernando Martinez niadtong Pebrero 27.
Sa Oktubre 9, tinguha unta niya nga malabni og balik ang titulo apan sa gihapon kapildihan maoy naangkon sa ilang rematch ni Martinez.
Si kanhi four-division champion Donnie “Ahas” Nietes, taliwala sa iyang pangidaron, misuway unta usab paglangkat sa kampiyonato, apan kapakyasan ang naangkon.
Tungod niini, ang Games and Amusement Board (GAB) naalarma ug mihimo gilayon og mga lakang uban sa mga local boxing stakeholders nga mahatagan og positibong pagtagad ang negatibong sitwasyon.
Hinuon, sa uwahing bahin sa nilabayng tuig, dunay mga marka nga naghatag og maayong timailhan sa naghinapos nga bahin sa 2022.
Sa iyang lindog sa Philboxing. com, si Teodoro Medina Reynoso mibutyag og mga bag-ong pangalan nga inanayng milutaw ug nakulit sa international scene nga posibling magdala na usab sa dungog sa nasod.
Usa na niini ang back-to-back nga kadaugan ni Vincent Astrolado batok sa inilang mga kontra nga sila si Guillermo Rigondeaux sa Africa ug Nikolay Potapov sa Russia.
Si Dave Apolinario nga mao karon ang IBO world champion, Jade Bornea nga mi-TKO ni Muhammed Obbadi alang sa WBC-NABF superflyweight, si Miel Fajardo nga mi-knockout ni Aguston Mauro Gauto sa Argentina, Jayr Raquinel (WBO International Superflyweight king), ang kadaugan nila ni Carl Jammes Martin sa WBA Asia superbantamweight title, Esneth Dominggo nga mikutlo og duha ka sunodsunod nga daog sa Japan, ang kanhi amateur standout nga si Charly Suarez ug uban pa.
Sa sayong bahin, sa 2023 gikatakda nga adunay mga Pinoy fighter nga nakakuha na usab og kahigayonan nga makaaway alang sa world title.
Kini sama nila ni Melvin Jerusalem kinsa mosuway’g langkat sa bakus ni WBO minimumweight champion Masataka Taniguchi, Magsayo batok Isaac Dogboe sa Ghana alang sa eliminator fight, Regie Suganob batok sa laing Pinoy nga si Mark Vicelles sa light eliminator ug ingon man si Marlon Tapales nga mao karon ang mandatory challenger ni WBA-IBF super bantamweight champion nga si Murodjon Akhmadaliev sa Uzbekistan.
Kini ug daghan pa ang atong atngan karong tuiga.
Dungan niini mao usab ang paglingkod sa bag-ong chairman sa GAB nga si Richard Santos Clarin kinsa maoy hulip ni kanhi GAB chair Abraham “Baham” Mitra.
Hinaot nga ang tuig 2023 mabuhangon ang natad sa paugnat sa kusog sa yutang Pilipinhon.
Happy New Year kanatong tanan!!! and God Bless.