Gipilde sa Bay Area Dragons ang San Miguel Beermen sa semifinals match-up apan gidayeg sa higanteng Insik ang ang 6-time PBA MVP June Mar Fajardo.
Si Liu Chuanxing, ang 7’5” nga higante sa Dragons ug si Fajardo, maoy giatangan nga match-up niadtong higayona diin usa ka higayon niana gipa-check-up pa sa dentista ang ngipon sa Chinese gumikan kay aksidente nga naigo sa siko sa Pinoy atol sa game 2 diin si June Mar nipaarak og 35 puntos.
“I learned some stuff playing against him. He has played in this league for a long time. He has a lot of experience playing against players that I really look up to. I hope to keep learning from him,” matod ni Liu sa interbyu sa spin.ph.
Apan ang higanteng Insik wala na nihatag og igo nga gibug-aton sa pagkaigo niya sa siko ni Fajardo bisan kon nag-mouth guard na siya sa game 3 sanglit wala kini tuyoa.
“I showed him, look at my tooth. It was a very good interaction. We knew it was an accident. It was all good,” dugang ni Liu.
Alang kang Liu, ang match-up nilang Fajardo usa sa iyang gilantaw dihang nipirma siya og kontrata sa Dragons isip foreign guest sa PBA Commissioner’s Cup.
Matod pa sa Chinese giant nga bisan sa overseas, tunog na ang ngalan sa PBA superstar nga lumad nga taga Pinamungajan.
“Even before I came to the Philippines, I heard of June Mar. Very experienced. Very successful athlete. We already heard of him before we came to play,” paghulagway sa 23 anyos nga si Liu.
Siya nanghinaot nga makakat-on sa mga lihok ni Fajardo ug mahimo niya kining magamit sa umaabot niya nga mga duwa bisan dili na sa PBA.
Sa kasamtangan, si Liu ug ang Dragons anaa pa sa Finals match batok sa Ginebra diin ang ilang best-of-seven series nagtabla sa 1-1. (PAC)