Sa akong trabaho, sayon ra nako ang pagpangita aron makatan-aw og CCTV footage sa usa ka aksidente sa dalan, labina kon maglimbigit og cyclist.
Dihay higayon nga nakakita ko sa CCTV footage sa usa ka tawo nga nagbiseklita nga nasaghiran og trak dayon natumba ug naligsan dinhi sa Sugbo. Nakakita sab ko og laing video sa cyclist nga naligsan sa prime mover nga iyang giabayan.
Naghisgot ko aning road accidents nga nangahitabo dinhi sa Sugbo ug ubang mga dapit sa nasod taliwa sa plano sa Dept. of Transportation (DoTR) sa pagbutang pa og dugang bike lanes sa kadalanan sa nasod. Nipasigarbo sila sa ilang nahimong lanes sa nagkadaiyang mga dapit sa Pilipinas.
Karon nagplano sila sa pagdugang pa aron pagdasig sa katawhan sa pagbiseklita.
Angay ba ning ikalipay? Di gyud. Alang nako, hangtod nga di makabutang ang kagamhanan og luwas nga agianan sa mga nagbiseklita, di maayo nga magbutang ini kay usik lang sa pundo.
Sa Metro Manila lang sa 2021, ang Metro Manila Accident Reporting and Analysis System nitala og kinatibuk-ang 2,397 ka mga aksidente nga naglambigit og biseklita. Ambot kaha diri sa Metro Cebu kon duna bay record. Wa man tingali.
Malikayan lang ang mga aksidente kon dunay imprastraktura nga manalipod sa mga siklista gikan sa mga sakyanan.
UYON SA LANE
Wa may problema sa bike lane unta. Apan kon paagian og mga sakyanan, labina mga motorsiklo, wa kini manalipod sa mga siklista gikan sa ubang mga behikulo sa kadalanan.
Di usab luwas ang mga bike lane nga gihimong parking space sa mga sakyanan sa mga establisemento o residensya kay way kabutangan sa ilang sakyanan. Kon di man gani, gihimong tipik sa carwash.
Pipila lang ni sa mga problema nga gisagubang karon sa Sugbo Bike Lanes Board nga maoy gitugyanan sa pag-atiman sa bike lanes. Di lalim ang tahas nila.
Hinaut pa nga ang transportation agencies sa kagamhanan di magdali-dali sa pagbuhat og bike lanes. Tun-an og maayo kon mahimo ba o di sa usa ka lugar. Di lang kay butang lang og pataka.
EHEMPLO
Ang 3-kilometro nga exclusive bike lane sa may South Road Properties (SRP) ang usa sa maanindot nga ehemplo. Nindot kay wa may sagol nga laing matang sa sakyanan nga makaagi.
Maayo unta kon wa pay kamote drivers o kaskasero nga magpadagan sa sakyanan sa dalan. Apan daghan kaayo ang mga siaw sa karsada, ma two o four-wheeled vehicle drivers.
Nganong di man mogamit og consultant ang kagamhanan, sama sa mga langyaw sa Europe nga bisan gagmay ang mga karsada, ilang nahimong luwas ang bike lanes?
Dako kaayo og ikatabang sa mobility sa mga kabus ang bike lanes taliwa sa mimahal og maayo nga pletihan karon samtang nagkahuyang ang pandemic.
Magkalayo ang biyahe, duol na sa doble ang kadako sa pletihan. Apan di angay patakaan ang pagbutang og bike lanes kay usik sa kwarta, kuyaw gihapon sa nagbiseklita.