Utok ug kusog ang gamiton sa Prime Stags Sports (PSS) boxers nga sila si ex-world champion Milan “El Metodico” Melindo ug Kit Ceron Garces sa ilang umaabot nga tahas – utok kang Melindo ug kusog kang Garces.
Si Melindo, kinsa kanhi International Boxing Federation (IBF) ug Inter Boxing Organization (IBO) flyweight champion, makigbatok kang Thai fighter Chaiwat Buatkrathok alang sa inilugay sa bakanteng Oriental and Pacific Boxing Federation (OPBF) silver featherweight title karong Enero 11, 2023 sa Cebu City Sports Complex.
Kini maoy main event sa ikaduhang promosyon sa PSS Fight Series nga giulohan og Prime Fight II nga tipik sa kasaulogan sa Sinulog Festival.
Sa top supporting bout, si Garces, kinsa maoy bag-ong World Boxing Foundation (WBF) Australasian flyweight champion, makigsangka ni Neli James Maquinlan sa Compostela Valley sa usa ka non-title bout.
‘Dili ko mo-promise og knockout kay moabot ra man na ang knockout. I want the crowd to learn the science of boxing,” matod ni Melindo sa press conference kagahapon, Enero 2, 2023, sa Cafe Point nga nahimutang sa 2nd floor sa M Tech Auto Center sa North Reclamation Area.
Gitataw ni Melindo nga tinguha niyang maguba ang away sa iyang kontra gamit ang iyang abilidad ug estudyohan niya’g maayo ang sitwasyon aron masayran niya kon unsay angay niyang buhaton ibabaw sa ring.
“My strategy is to frustrate my opponent pero di lang gyud ko mokompiyansa because my opponent is a hard puncher. Mind game lang,” dugang ni Melindo.
Si Buatkrathok adunay 38-7, 25KOs nga rekord samtang si Melindo naghupot og 38-5, 14KOs nga baraha.
Si PSS Vice President Pocholo Padilla niangkon nga delikado kini nga away alang sa 34 anyos nga si Melindo.
“Is it a risk? Yes it is a risk but we have to take it now because Milan is not getting any younger,” asoy ni Padilla.
Gipasabot ni Padilla nga mao kini ang labing dali nga agianan aron mahibalik si Melindo sa world ranking.
Sa iyang bahin, nagkanayon si Garces nga knockout nga kadaugan gyud ang gusto niyang maangkon.
“I-promise nako sa akong team nga akong i-knockout akong kontra,” asoy ni Garces, kinsa lumad nga taga Talisay City, Cebu.
Si Garces naggunit og 5-0, 4KOs nga rekord samtang si Maquinlan adunay 4-1, 3KOs nga baraha.
Ang promosyon, nga sugdan sa alas 12:00 sa udto, adunay 10 ka amateur bouts ug 10 sab ka professional bouts.
Ang mga tiket nagbalor og P50, P100, P500, P1,000, ug P1,500.