USA ka semana human sa pagpatay kang Yvonne Chua, ang Davao City Police Office (DCPO) nagtanyag og P1 milyon nga ganti alang sa mga lead aron masulbad ang kaso.
"May concerned citizen nagbigay sa atin ng support to fast track our investigation for the implication of the suspect kung sino man ang makakabigay ng impormasyon sa identity ng bumaril," ingon ni Police Colonel Alberto Lupaz, DCPO Director, atol sa press conference, kagahapon, Enero 3, 2023 didto sa DCPO Headquarters.
Niadtong Disyembre 29, 2022, ang negusyanteng si Chua gipatay sa gawas sa iyang giabangan nga balay sa Buttercup Street, Green Meadow Subdivision, Brgy. Sto Niño, Tugbok District, Davao City.
Duha ka wa mailhing armado gamit ang kalibre .45 nga pistola ang mipusil sa biktima nga nakuhaan pa sa closed-circuit television (CCTV) camera.
Ang tigpamaba sa Police Regional Office nga si P/Maj. Eudisan Gultiano niingon nga posibleng tulis ang motibo sa maong mga armado.
"Ayon sa CCTV footage, ang unang ginawa ng gunman is talagang binaril agad, at para talagang gusto niya pang barilin ulit kaso lang nag-jab yong baril tapos after that tsaka kinuha yong bag," ingon ni Gultiano.
Dugang pa niya nga adunay klarong tuyo ang duha ka mga mamumuno nga patyon ang biktima.
"Inaalam pa natin kung meron pang people behind, kaya yon ang direction ng ating investigation," butyag sa opisyal.
Gawas sa tulis, si Gultiano niingon nga personal grudge ang ilang gikonsiderar nga usa sa motibo sa pagpatay.
Sa pagsulat niini, si Lupaz niingon nga aduna silay duha ka persons of interest apan dili nila mabutyag ang impormasyon tungod kay wala pa silay konkretong ebidensiya.
Wala hinuon nila gikompirmar ug wala usab gihimakak ang kalambigitan sa usa ka taas nga opisyal sa gobyerno nga gihinganlan sa social media tungod sa giingong post sa biktima diha sa Facebook sa wa pa kini gipatay.
"Wala pa kasi talagang evidence pa na na-gather," ingon ni Gultiano.
Si Gultiano niingon nga mopagawas na sila og updates sa imbestigasyon sa higayon nga makatigum na sila og ebidensiya sa pagpatay nga direktang makatudlo sa person of interest.