Dili momenos sa unom ka mga lokal nga kagamhanan sa Probinsya sa Sugbo ang moapil sa Sinulog sa Kabataan karong Enero 8, 2022.
Sa interview sa radio station dyLA, si Jojo Labella, chairman sa Sinulog Foundation Inc.(SFI), nagkanayon nga adunay 19 ka mga contingent nga moapil sa kalihokan.
Gipaabot nga 13 niini ang gikan sa dakbayan sa Sugbo ug ang uban gikan sa probinsiya sa Sugbo.
Gawas sa mga highly urbanized cities sama sa Mandaue ug Lapu-Lapu, moapil usab ang component cities sa Talisay, Toledo ug Carcar.
Sa nasayran, pipila sa mga contingent modiretso na lang sa grand parade sa Enero 15.
Gidugang ni Labella nga gamay ra ang partisipante karon hilabina nga naglisod pa sa pinansyal nga bahin ang pipila sa mga LGU gumikan sa epekto sa pandemya gumikan sa Covid-19.
“Gikan pa ta sa pandemic. Daghan to ang dunay intention but ang uban especially ang out of town daghan man to ang ning-signify kay as early as August naghimo na ta og invitation but murag maglisod gyud sila financially even with the financial assistance nga atong gi offer,” matod ni Labella.
Ang Sinulog sa Kabataan gikatakda nga ipahigayon sa Cebu City Sports Center samtang ang grand parade adto sa South Road Properties (SRP).
Ang Cebu City ug Provincial Government ningsaad nga mohatag og financial assistance sa mga LGU nga moapil sa Sinulog.
Magtunga ang Siyudad ug Lalawigan sa P1.6 milyunes nga assistance, pahibawo sa Kapitolyo sa sayo pa.