Moabot sa P7.5 milyunes nga balor sa ilegal nga drugas ang nasakmit sa Police Regional Office (PRO) 7 sa usa ka adlaw nga Simultaneous Anti-Criminality Law Enforcement Operation (Sacleo) nga gisugdan sa alas 12:01 sa Lunes sa kaadlawon, Enero 2, 2023, nga natapos sa alas 12:01 sa kaadlawon sa Martes, Enero 3, 2023.
Dili lang drugas ang nasakmit sa kapulisan, lakip na ang loose firearms ug pagpuhag sa ilegal nga sugal nga nag-operate sa Central Visayas.
Atol sa usa ka adlaw nga dungan nga operasyon sa nagkalainlaing police stations ubos sa PRO-7, nakalusad kini og 95 ka buy-busts nga niresulta sa pagkasikop sa 104 ka drug personalities.
Nakasakmit usab og 1,114.55 ka gramos nga gituohang shabu nga dunay standard drug price (SDP) nga P7,578,940.
Nanguna sa buy-bust ang kapulisan sa dakbayan sa Lapu-Lapu nga dunay 538.15 gramos nga drugas nga nasakmit nga dunay SDP nga P3,659,420. Gisundan kini sa Cebu City Police Office (CCPO) nga dunay P2,731,016 ug 128.03 grams sa Cebu Police Provincial Office (CPPO) nga mobalor og kapin P870,000.
Nakalusad sila og 88 ka illegal gambling operations nga niresulta sa pagkasikop sa 204 ka mga sugarol ug pagkasakmit sa 141 ka illegal gambling paraphernalia nga moabot usab og P46,519 nga pusta ang nasakmit.
Nakaimbargo usab ang kapulisan og 122 ka unlicensed firearms, duha ka explosives ug 12 ang nadakpan nga naghupot niini.
Nasikop usab nila ang pito ka most wanted persons ug 83 ang wanted persons nga dunay mga pending warrant of arrest nga giluwatan ang korte.
Matud ni Police Brigadier General Jerry Bearis, hepe sa PRO 7, nga iyang gihangop ang accomplishments sa usa ka adlaw nga Sacleo sa kapulisan sa Central Visayas.
“This one-day accomplishment is a product of your utmost commitment and diligence in our anti-criminality campaign, thus, let us continue to carry out these relentless efforts in the performance of our duties and responsibilities with endless support from our community and other law enforcement agencies,” pulong ni Bearis.
Nimando si Bearis nga hingusgan pa ang ilang kampanya batok sa kriminalidad ilabi na nga nagkaduol na ang Sinulog grand parade aron mapugngan ang mga krimen nga mahitabo sa dakbayan ug lalawigan sa Sugbo.