Mosuway pagkulit og dominanteng 3-1 nga bintaha ang Brgy. Ginebra Gin Kings sa ilang pagpakigsangka og balik sa Bay Area Dragons karong alas 5:45 sa hapon, Enero 6, 2023, sa Game 4 sa Philippine Basketball Association (PBA) Commissioner’s Cup finals series sa Mall of Asia Arena sa Pasay City.
Ang Gin Kings ningrehistro og 89-82 nga kadaugan sa Game 3 nga maoy naghatag kanila og 2-1 nga bintaha sa best-of-seven series niadtong Enero 4, 2023 sa gabii.
Ning sangkaa, dobleng blackeye ang naangkon sa Dragons gumikan kay gawas sa kapildihan, naangol sab ang wa nga tiil sa ilang import nga si Andrew Nicholson.
Human sa iyang pagkaangol, gihatod si Nicholson sa ospital ug wala na’y dugang detalye nga nakuha kabahin sa iyang sitwasyon.
Gibutyag sa PBA nga wala mopahibawo ang Dragons nga mag-ilis sila og import hinungdan nga gituohang makaduwa ra karon si Nicholson.
Naa o wala si Nicholson, ang Gin Kings nangandam gihapon og maayo sa adjustment nga pagabuhaton sa Dragons ug nagkinahanglan sab gihapon sila sa ilang giksonsiderar nga Sixth Man – ang mga tumatan-aw.