Niadtong nag-angat pa ang Pasko, nagpa detox ko sa usa ka establisemento sa may Colon. Sa akong pagpaminaw, dunay ion ang cleansing nila. So, nag research ko unsa nang ion.
Ang negative ion mao diay na ang maayo kay motabang sa healing sa atoang lawas. Naay daghan ani sa kabaybayunan, kasapaan, mga busay ug kalasangan.
Mao diay nang nindot ang imong paminaw sa lawas kon naa ka sa baybayon, sapa o kakahuyan. Makasinati ka og maayo nga feeling. Di ba, ang kanang ubhon ug sip-unon ingnon man sa mga karaan nga adto’g daplin sa dagat?
Naa say mga nakasinati og stroke nga ilubong ang lawas sa bas sa baybayon, kon mahimo, kada buntag.
Mao ni ang akong rason nga mas ganahan ko og mountain biking kay makaadto ko og mga dapit nga dunay daghang mga kahoy. Mahimo sab nga makasubay sa kasapaan. In short, mas duol o naa ka sa maanindot nga palibot. Nature ang imong padulngan ug tadlasan nga dunay ion.
Kanang sayo kaayo ko sa buntag makagikan, bisan pag naa lang ko sa karsada sa bukid, nindot na man gani maminaw sa huni sa mga langgam nga mao say pagpangita og pagkaon sa sayo sa buntag.
Apan karon, bisan nag road bike ka, tungod kay sementado na ang sagad mga karsada sa kabukiran, mahimo na sab nga mosaka ang mga roadie. Apan lahi ang MTB kay makasuot man sa kakahuyan.
Ang cross between sa MTB ug road bike nga mao ang gravel bike medyo kaya but kinahanglan ang pag-amping og maayo.
BIKE TRAIL
Kon ang kagamhanan dunay plano sa pagpalambo sa panglawas sa mga Pinoy, mas nindot kon dunay parallel nga karsada alang sa mga magbiseklita. Kanang di lang siya tipik sa karsada kon di separate siya nga subayan sa mga mag biseklita.
Maka imagine ko sa kadaghan sa mga mag bike, labina kon duna ni gitas-on nga labing minos 50 ka kilometro. Maorag nag fiesta ang karsada kay daghan ang mag bike. Proven na man ni.
Tinuod, nganong di man kaayo daghan ang nanggamit sa exclusive bike lane sa South Road Properties? Kini tungod kay tuyuon ang karsada. Ikaduha, ang tres kilometros duol ra kaayo na.
Maayo lang lang na sa mga nagtuon pa or kadtong gusto lang magpasingot.
Ikatulo, kuyaw ang pagpaingon sa dapit tungod sa kadaghan sa mga sakyanan kansang mga driver magpahaguros sa pagdagan.
NGANONG DI HIMUON?
Maanindot unta kon ang Dept. of Transportation ug Dept. of Public Works and Highways magtambayayong aron mahimo ni. Gawas nga maghimo kining luwas sa mga nagbiseklita, daghan ang maengganyo sa pag bike.
Di ni suntok sa buwan nga proyekto kay nagtubo baya ang atoang ekonomiya. Sa ato pa, sa umaabot, duna tay kwarta nga ikagasto na.
Ang ubang mga nasod, labina sa pipila ka states sa Amerika, dunay mga karsada alang ra sa biseklita. Usa nako ka higala naka bike kay 150 kilometro ang gitas-on. Makasuya baya kay ang atoa diri,wa bisan usa. Makig-ilog ta sa motorized nga mga sakyanan. Usahay magtan-aw ko nila, makaingon ko og sanaol.