Biyudo nga gidudahang gipaningil sa bayad sa ilegal nga drugas apan wala makahatag gipusil patay dayon gihagbong pa sa lungag sa wa matukod nga kasilyas ug napalgan alas 6:30 sa buntag sa Sabado, Enero 7, sa Sitio Ibabao, Brgy. Perrelos, dakbayan sa Carcar.
Ang biktima nga giilang si Russ Labra Garame, 53, kanhi habalhabal driver, nagpuyo sa lugar, nakaangkon og samad pinusilan sa agtang, liog ug ubang parte sa kalawasan.
Ang kapulisan nagtuo nga duha ka mga tawo ang responsabli sa kremin.
Si Police Staff. Sgt. Robert Gemoya, imbestigador sa Carcar Police Station nga nahinabi sa Superbalita Cebu, nagkanayon nga alas 12:30 sa kaadlawon Sabado, ang mga silingan nakadungog og upat ka mga buto sa wala matinong kalibre sa armas.
Pagkabuntag nakit-an na lang si Garame nga naghayang sa lungag nga giabandonar alang unta sa pansayan.
Naligo siya sa dugo tungod sa daghang mga samad pinusilan sa lawas.
Walay nakakita sa mga killer apan nagtuo ang kapulisan nga gipaningil ang biktima sa halin sa drugas.
Nakita nila sa crime scene nga dunay nahitabong kagubot ug gipugos sa mga killer ang biktima sa paggawas sa balay.
Sa gawas sa balay didto gipusil ang biktima nga nahagba sa pultahan base sa mga kabhang sa bala sa armas nga nagtapok.
Gihuboan sab sa mga killer si Garame ug daw duna silay gipangita sa panimalay ug sa lawas sa biktima.
“Human ani nilag pusil ilang gidayungan, gitambog sa lungag sa abandunadong pansayan kay libon man,” dugang ni Gemoya.
Si Gemoya niingon nga utang sa ilegal nga drugas ang ilang gisunod nga motibo sa krimen.
Ang impormasyon nga nakuha sa kapulisan gikan sa mga tawo sa lugar, giingong nalambigit sa ginadiling drugas ang biktima.
Sumala pa ni Gemoya nga dili layo ang posibilidad nga gipaningil ang biktima sa gikuha niini nga illegal drugs.
Hinuon, ang biktima wala malakip sa listahan sa kapulisan sa ilegal nga kalihukan.
Nagpadayon ang imbestigasyon sa kapulisan kabahin sa insidente. / GPL