GIBUTYAG ni Konsehal Enzo Villafuerte sa Konseho sa siyudad sa Davao nga dunay daghang mga kaso sa "bullying" sa dakbayan apan ang mga tulunghaan way gihimong aksiyon bahin niini.
"Nag-interview ko og mga parents kung naa ba sila'y experiences of bullying diri sa schools nato sa Davao, and daghan ko'g na-istoryahan nga naa gyud cases of bullying and wala’y ginabuhat ang mga teachers nato and principals nato para i-address ang bullying," butyag ni Villafuerte sa dihang nahinabi sa Davao City Disaster Radio niadtong Enero 5, 2022.
Bisan kon naay nasudnong balaod sa Anti-Bullying niadtong 2022, gisugyot ni Villafuerte nga magpanday og city ordinance aron nga palapdan ug palig-unon ang balaod sa pakig-away batok sa "bullying" sa dakbayan.
"Karon nakita nato nga taas ang cases of suicide, depression, maybe during the pandemic and since stay at home ra man ta mahimo pud rampant ang cyber-bullying. So, through this ordinance, maprotektahan nato tong ma-bully," tataw sa konsehal.
Sulti sab niini nga ang gisugyot nga ordinansa magmugna og Anti-Bullying Council aron nga dakpon ang masinupakon apil na ang mga administrador sa mga tulunghaan.
"If dili i-address sa mga schools ang bullying or workplaces, ipatawag sila kay nganong wala sila’y nabuhat bahin ani nga kaso," pasidaan niya.
Ang wala sab maresolba nga mga kaso nga way tataw nga resulta atimaon sa konseho.
"Sila ang mag-recommend kung unsa pay puwede buhaton with regards sa cases," pasalig niya.
Pagklaro ni Villafuerte nga ang gisugyot nga ordinansa maglakip sa tanang mga tulunghaan gikan sa "primary" hangtud "tertiary" nga level, apil na sa mga trabahoan.