Gitapos sa Orlando Magic ang ilang sobra 10 ka tuig nga pagkaparot sa korte sa Golden State Warriors human gipatumba ang defending champion, 115-101, sa National Basketball Association (NBA) regular season game kagahapon didto sa San Francisco, California.
Sobra 10 ka tuig nga wala gyud katilaw og daog ang Magic sa Bay Area nga mao ang balwarte sa Warriors sukad niadtong Disyembre 2012.
Nabugto ang losing streak kagahapon diin mipahimulos ang Magic sa pag-absent nila Stephen Curry ug Klay Thompson tungod sa injury.
Nagkumboya si Paolo Banchero ug Franz Wagner og 49 puntos aron aswaton ang Magic ngadto sa kadaogan batok sa defending champion.
Midugang pud og kusog sa Magic sila Cole Anthony nga adunay 16 puntos, pito ka rebounds ug walo ka assists, ug si Wendell Carter jr. nga mitunol og 13 puntos inubanan sa 10 ka rebounds.
Si Anthony Lamb mibuhat og career-high 26 puntos, miamot si Jordan Poole og 21 puntos samtang si Donte DiVincenzo mihatag og 15 puntos ug walo ka rebounds alang sa pilderong Warriors.
Nakabalik na unta sa Warriors lineup ang All-Star forward nga si Andrew Wiggins ug ang beterano nga si Andre Iguodala nihimo na sa iyang season debut, apan si Thompson wa makaduwa tungod sa soreness sa repaired left knee.
Nag warm up na unta si Thompson, gipahibawo usab siya isip lakip sa starting lineup atol sa program introduction, apan misakit ang injury niini atol sa warmup.
“It got sore during warmups and the training staff looked at him and for precautionary reasons kept him out of the game,” batbat ni Golden State head coach Steve Kerr.
Si Wiggins mihimo og 12 puntos sulod sa 19 minutes sa iyang unang duwa human ang 15-game absence tungod sa strained muscle sa right upper leg.
Samtang ang two-time Most Valuable Player ug four-time champion nga si Stephen Curry nagpahuway sulod na sa 11 ka sunodsunod nga duwa sa Warriors tungod sa partially dislocated left shoulder. Gilauman nga makabalik na si Curry karong semanaha.
Batbat pa ni Kerr nga mas agresibo ang Magic sa karon nga duwa ug wala makakuha og momentum sa duwa. / RSC