Di nato ikalimod nga sa miaging tuig, nagpuasa ang natad sa boxing sa Pilipinas human gipanghuboan sa ilang mga bakos ang tagsatagsa nato ka world champions.
Sugod niadtong bulan sa Hulyo sa 2022, ang Pilipinas nahutdan og world champions ug mibiya sa maong tuig nga wa gyuy nakaangkon og kampiyonato sa major boxing bodies.
Apan sa miaging adlaw, giablihan og maayong lihi ang tuig 2023 sa Philippine boxing human impresibong gi-knockout ni Melvin Jerusalem si Masataka Taniguchi aron langkaton ang World Boxing Organization (WBO) minimumweight title didto sa Japan niadtong Biyernes sa gabii sa Osaka, Japan.
Usa ka jab nga gisundan og solidong right straight ngadto sa nawong ni Taniguchi maoy mitumba sa Hapon kinsa misuway unta pagbangon apan pakyas sa pagsanong sa eight-mandatory count ni referee Robert Ramirez Jr. nga maoy nakapaundang sa away.
Human nga gideklarar nga unfit to fight si Taniguchi, tumang kalipay sa selebrasyon maoy mipatugbabaw sa 28-anyos nga kanhi sakop sa nasira nga Ala Boxing Gym, lumad nga taga Manolo Fortich, Bukidnon apan atoa na karon nagbasehan sa General Santos City.
Kini nahitabo sa nahabiling dos minutos sa second round ug sa kadaugan si Jerusalem maoy bugtong karon nga Filipino world boxing champion ug mao usab ang unang world champion sa tuig 2023.
Samtang si Jerusalem misaka sa 20-2, 12 KOs nga record, si Taniguchi sa iyang bahin, nahagsa sa 16-3 nga baraha.
Kadto maoy ikaduha untang pagdepensa ni Taniguchi kinsa mi-TKO sa iyang kataginasod nga si Kai Ishizawa Abril sa miaging tuig.
Kining nahimo ni Jerusalem naghatag kini og maayong timaan sa atong professional boxing ug nagtuo ko nga sulod ning tuiga, daghan pang mga Pinoy fighter nga makahatag og titulo ug garbo sa atong yutang tabunon.
Si Jerusalem ubos na karon sa pagdumala sa Sanman promotion ni JC Mananquil.
Congratulations ngadto kang Jerusalem! Hinaot nga madepensaan ug magdugay diha kanimo ang titulo.
* * *
Laing giatngan sa mga local boxing aficionados mao kining pagbalik og away ni Milan El Metodico Milendo human sa duha kapin ka tuig nga pagpahuway.
Sukwahi sa mga pagtuo sa uban, si Melindo wala diay ni moretiro. Gidungog man gud ni siya nga misang-at na sa iyang gloves ilabi na niadtong pagsira sa Ala Boxing Gym apan matod niya nga desisyon niya nga mopahuway lang una aron makapanukad og balik ang iyang lawas.
Sa iyang unang away gikan sa hataas nga pagpahuway, iyang gipaundang si Crison Omayao sulod sa unom ka round.
Apan para nako, kadtong awaya dili kadto maoy barometro nga anaa pa niya ang kalantip gumikan kay si Omayao, ug sa tinamban pa nga termino, usa ka sud-anon.
Kana bang himuon lang iglalawg kay tiaw mo bay ang iyang record 24 ka daog ug 23 sab ang pildi unya dunay lima ka tabla.
Ang tinud-anay nga sukdanan kon anaa pa ba gihapon niya ang kalantip mao kining iyang away batok sa Thailander nga si Chaiwat Buatkrathok kinsa nakabaton og dakong bintaha batok kaniya.
Ang away karong Enero 11, 2023 diha sa Cebu City Sports Complex.
Ang Thailander mosaka ibabaw sa ring nga mas dako ug taas batok ni Melindo.
Gawas niini, nagpadayon ang pagka aktibo niini nga gani sa miaging tuig, ka pito ni makaaway - lima ang daog ug duha ang pildi.
Laing aspeto sa bintaha mao ang pangidaron sanglit 30 anyos pa ang Thailander samtang si Melindo 34 na.
Lain pa gyud mao ang timbang kay ang featherwieght division nga maoy awayan, maoy naandan nga timbang ni Buatkrathok samtang si Melindo nga kanhi light flyweight champion, ang moapas sa timbang.
Sa tinud-anay lang ang akong simpatiya atoa ni Milan apan ambot unsa ug asa nga porsiyento siya makabintaha.
Pag-ampo ug panghinaot ra gyud maoy akong bugtong nakita nga nakapabor si Melindo.
But still, good luck kanimo, Dol.