Lakers gipaluhod ang Kings; Bulls misungag sa Jazz

Ang duha ka free throws ni Dennis Schroder sa nahabiling 3.6 segundos mihatag sa Los Angeles Lakers og kadaogan batok sa Sacramento Kings, 136-134, sa National Basketball Association (NBA) kagahapon didto sa Sacramento, California.

Ang game hero nga si Schroder mitapos sa duwa nga adunay 27 puntos alang sa Lakers nga miuswag ngadto sa 19-21 (win-lose) nga baraha.

Si Lebron James miposte og 37 puntos, walo ka rebounds ug pito ka assists aron dad-on ang Lakers ngadto sa ikalima nga sunodsunod nga daog.

Ang bigman sa Lakers nga si Thomas Bryant nagmangtas usab sa ilawom pinaagi sa iyang 29 puntos ug 14 rebounds.

Si De’Aaron Fox adunay 34 puntos ug siyam ka assists alang Sacramento. Nakaitsa pa si Fox og halfcourt shot sa buzzer apan sipyat kini.

“Trending in the right direction and learning from our mistakes,” batbat ni Lakers coach Darvin Ham. “At the end of the day, everything we have gone through I think has been a huge education for us. We are trending in the right direction currently.”

Ang Kings gipangulohan ni Domantas Sabonis nga adunay 25 puntos, 12 rebounds ug pito ka assists. Si Harrison Barnes midunol og 18 puntos samtang si Kevin Huerter adunay 17.

Samtang didto sa Chicago, gisungag sa Chicago Bulls ang ilang bisita nga Utah Jazz, 126-118, pinaagi sa mainiton nga fourth quarter ni All-Star guard Zack LaVine.

Mipabuhagay og tulo ka sunodsunod nga three-point shot si LaVine ug mitapos sa duwa nga adunay 36 puntos, samtang si DeMar DeRozan miamot og 35 alang sa Bulls.

Ang tulo ka three-points ni LaVine mihatag og otso puntos nga labaw sa Bulls. Wa na gyud milingiw ang Bulls hangtod sa final buzzer.

Sa maong duwa, naapsan ni DeRozan si Paul Gasol ug Bob Pettit alang sa 40th place sa NBA’s career scoring list.

Ang kanhi Bulls player nga si Lauri Markkanen nangulo sa Utah sa iyang 28 puntos. / RSC