IPAHIGAYON sa lima ka mga barangay sa Siyudad sa Tagum ang free massive rabies vaccination alang sa mga binuhing mga iro ug iring magsugod karong adlawa, Enero 10 nga matapos sa Enero 27, 2023.
Nasayran nga himuon ang pagpamakuna karong adlawa, Martes, sa Barangay Liboganon. Samtang sa Enero 11 sa Barangay Busaon, Enero 17 ug 18 sa Barangay Bincungan, Enero 24 ug 25 sa Barangay San Isidro ug Enero 26 ug 27 sa Barangay Madaum.
Matud pa nga personal nga adtuon sa mga personahe sa City Veterinary Office ang mga nahisgutang barangay sa maong petsa aron nga mahatud ang libreng serbisyo.
Nanawagan ang buhatan sa CVO sa mga buot nga mabakunahan ang ilang mga binuhing hayop nga makigkoordinar lang sa tagsa-tagsa nila ka barangay o sa purok leader alang sa maong kalihukan.
Nagpahinumdom ang nahisgutang buhatan nga ang rabies mahimo lang ihatag sa hayop nga iro ug iring sa edad nga tulo ka bulan pataas ug kadtong walay gibating bisan unsang sakit.
Giawhag sab ang mga tag-iya sa mga hayop nga kung dili makontrol ang mga alaga busalan daan ug dad-an og higot atol sa pagbakuna.
Giklaro sa CVO nga way ipahigayon nga "house-to-house" nga pagpamakuna sanglit ang pagpamakuna ipahitabo lamang sa mga vaccination site nga giandam sa barangay o purok lider.