Namatay ang usa ka ex-convict sa kaso sa ilegal nga drugas human pusila sa iyang kontra sa alas 11:10 sa Lunes sa buntag sa Enero 9, 2023, kilid sa Chinese cemetery, Barangay Carreta, dakbayan sa Sugbo.
Ang biktima giila nga si Lord Anthony Arenso Otto, 18, taga Sitio Laguna, Barangay Lorega San Miguel, Siyudad sa Sugbo, samtang ang suspek nga nadakpan sa hot pursuit operation sa mga sakop sa Mabolo Police Station uban sa Special Weapons and Tactics mao si Joey Aroa Dumaguit, 32, taga Greenside, Barangay Hipodromo.
Sigun sa pamahayag sa mga saksi sa dapit nga samtang nagtindog ang biktima, kalit lang nibutho ang suspek sa iyang luyo nga nagbitbit na sa iyang armas ug dayong pamusil tumong sa luyong bahin sa ulo niini.
Milapos ang bala sa walang bahin sa tampihak ni Otto nga maoy hinungdan sa iyang pagka tumba.
Dali nga niresponde ang medical team sa Barangay Carreta ug sa dihang ilang nakita nga nagginhawa pa si Otto, gidala nila kini sa Cebu City Medical Center apan gideklarar ni Dr. Keezel Nell At-At nga patay na.
Human nakuha sa Mabolo Police Station ang ngalan sa suspek, matod ni Police Major Eraño Regidor, hepe, ila dayon nga giadto ang balay niini sa Lorega.
Ilang naabtan ang suspek ug nakuha usab ang usa ka .38 kalibre nga armas nga maoy iyang gigamit sa pagpatay kang Otto.
Nitug-an, matud pa, ang suspek nga sa miaging tuig gipusil siya ni Otto apan wala siya mokiha sanglit nagtinguha siya nga mobalos.
Giatang-atangan na niya kini sa Lorega San Miguel, apan napakyas siya kay nadakpan sa buy-bust sa mga sakop sa City Drug Enforcement Unit sa Cebu City Police Office.
Sa miaging semana, nakagawas si Otto sa Cebu City Jail dinhi nakahigayon ang suspek sa pagbawos.
“Bawosbawos na sila. Ang estorya ana nila last year kaduha ni siya pusila sa biktima sa diskohan. Wala siya magpa blotter but it so happened nga na buy bust man sa CDEU, karon na priso nang tawhana nya nakagawas man na last week. Nibalhin nag puyo sa Carreta. Didto na niya nabantayan, iya na gyud gi bawsan,” matud ni Regidor.
Ang suspek ug biktima giingong pulos nangalambigit sa ilegal nga drugas, apan matod ni Regidor, ila pang gisubay kon ang hinungdan sa una nila nga bangi tungod ba niini.
Kasong murder ang giandam sa Mabolo Police Station batok kang Dumaguit nga giingong niangkon sa krimen nga iyang nahimo.