Gisugyot ni Cebu Governor Gwendolyn Garcia nga ipahigayon sa naandan nga venue sa Cebu City Sports Center (CCSC) ang One Cebu Island Sinulog 2023.
Ang kalihukan gikatakda nga ipahigayon sa South Road Properties (SRP) karong Enero 15, 2023.
“Considering my concerns as a governor...I would say that this is not the right time to change venues,” matud ni Garcia sa usa ka press conference sa Kapitolyo sa Enero 9, 2023.
Atol sa press conference, duha ka mga dagkong concern ang gihatagan og gibug-aton ni Garcia.
Una niini ang di maayong kahimtang sa trapiko sa maong adlaw, ilabi na nga sirad-an ang mga agianan paingon sa venue.
Lakip na niini ang Cebu South Coastal Road (CSCR) nga maoy tadlasan sa mga motorista ug konstituente sa habagatang bahin sa lalawigan sa Sugbo.
“If we do this now, unya kadto nga mga concerns, how many days to go I haven’t heard of a viable traffic plan yet. If we do this now and we are not able to fully address the consequences of holding it at this point in time, the Sinulog might not come up to expectations, worst daghan unya tag mga problema,” matud ni Garcia.
“Well ako, I can already foresee, dako kaayo ni og problema kon masirhan ang atong mga lungsod. Siguro dili sirhan but makairog kaha mo ang tanan nga vehicles, tanan nga mga trucks naa na tanan sa Natalio Bacalso? Dili gyud. If I were to be consulted as part of the One Cebu Island Sinulog,” dugang niya.
Gawas sa problema sa trapiko, iya usab gihimug-atan ang security concerns.
Matud ni Garcia nga bukas ug lapad ang venue sa SRP apan lapad usab ang posibilidad sa mga di maayong kalihukan.
Dugang niya nga aron mahatagan og igong seguridad ang tanan, mas maayo nga sundon ug ipahigayon ang kalihukan sa naandan na.
“It is so open. Ang sa Abellana man gud kahibaw na asa ipang station kay it’s so secure. It’s fenced and also ang buildings kahibaw na ta asa dapit. And I’ve danced several times na didto so kahibaw na asa ipamutang sa akong team...pero kani it’s an unkown thing. Di sila kahibawo unsaon mani og secure. Exposed kaayo. You cannot secure kay naay mga tag-as kaayong buildings nga you cannot secure,” matud ni Garcia.
Subay sa naasoyng concern, gisugyot ni Garcia nga mas maayong sundon lang una ang naandan.
Bukas hinuon siya sa pagpahigayon sa mosunod pa nga mga kasaulogan sa SRP apan kinahanglang preparahan ug andamon ilabi na nga dili lang mga Sugboanon ang bisita, lakip na ang mga langyaw nga turista.
Dugang niya nga mas maayo usab nga abagan ang mga negusyo nga anaa sa sentro sa siyudad sa Sugbo sanglit mao kini ang mga patigayon nga labing apektado panahon nga niigo ang pandemiya sa nasud.
Ning semanaha, pipila ang ningsaway sa wa gihapon mahuman nga set up sa venue kon asa ipahigayon ang One Cebu Island Sinulog 2023.
Lakip sa concern ang kalapok sa lugar subay na usab sa mga hulagway nga nikatap sa social media.
SRP GYUD
Apan bisan pa sa pamahayag ni Garcia, si Cebu City Mayor Michael Rama niingon nga sa SRP ipahigayon ang streetdancing.
Iyang gipaneguro nga gipaspasan og maayo ang trabaho ug iyang girespeto ang panahom ni Garcia.
“We will continue up to how far we can... we have been working double, triple (time). It has already been planned,” matud ni Rama.
Dugang sa mayor nga gikonsiderar na sa organizer ang tanang mga panghitabo atol sa adlaw sa festival.
Samtang giklaro usab ni Konsehal Phillip Zafra nga padayong gikonsiderar nila ang CCSC nga plan B apan nitataw nga kon trabaho sa venue, tukma sila sa ilang schedule.
Si Zafra miingon nga layo ra nga ibalik sa CCSC ang kalihukan tungod kay nahuman na ang entablado alang sa grand ritual showdown ug ang mga construction personnel nagtrabaho 24/7 aron makompleto ang amphitheater-type grandstand.
“Ever since we had our Sinulog, naa gyud tay plan B or C. The best option if naa tay plan B is Abellana (CCSC) gyud kay naa nay stage didto. As far as I am concerned, based sa progress sa trabaho ron, I am pretty sure nga maka-push ta dinhi sa SRP,” ni Zafra.
Dugang pa niya nga basta magpadayon ang pag-abag sa panahon, mahuman ang venue sa SRP karong Enero 12 o 13.
Kon gikinahanglan nga pilion ang fallback option, si Zafra niingon nga ang Kagamhanan sa Dakbayan maoy modesisyon “on time” ug posibleng usa ka adlaw sa dili pa ang pista sa Enero 15.
“Naa gyud appropriate time for that. We know kanus-a gyud angayan kay 24/7 naa mi gipa monitor sa trabaho diri unya kon unsay mga panghitabo, kon mahitabo gyud, a day prior or what (mo decide),” matud ni Zafra.