MAGSILBI unta siya nga inspirasyon sa mga kabus nga estudyante nga luyo sa pait nga kahimtang sa kinabuhi manlimbasog gayod aron nga makahuman sa pagtuon ug makab-ot ang kalampusan.
Kini ang gibutyag sa Top 8 sa Licensure Examination for Teachers (LET) niadtong Oktubre 2022 nga si Christian Dumas Taghoy.
Sa nakalabay nga Disyembre 2022 nigawas ang resulta sa LET sa bulan sa Oktubre 2022 kon diin 90 porsiyento sa mga nag-top gikan sa Davao Region.
Si Taghoy usa ka Pantawid Pamilyang Pilipino Program (4Ps) child beneficiary ug nahimong iskolar sa Expanded Students' Grants-in-Aid Program for Poverty Alleviation (ESGP-PA).
Niya pa, nga kini nga programa sa Department of Social Welfare and Developement (DSWD) maoy nakapalampos niya sa kolehiyo diin usa sa mga nahimong inspirasyon mao ang iyang pamilya nga bisan sa kapit-os sa kinabuhi anaa gayod ang moral nga suporta ngadto kaniya.
"I extend my deepest gratitude to the DSWD Pantawid Pamilyang Pilipino Program (4Ps) for giving me the opportunity to be part of the Expanded Students' Grants-in-Aid Program for the Poverty Alleviation (ESGP-PA) Scholarship during my university years," pagpaambit ni Taghoy pinaagi sa iyang personal Facebook account.
Sa iyang dedikasyon, pagsalig, ug kakugi, wala usiki ni Taghoy kining mga kahigayonan ug suporta gikan sa iyang pamilya ug sa gobyerno, busa, siya milahutay ug nakab-ot sa pagtuman sa usa sa iyang mga damgo nga mahimong usa ka magtutudlo.
"I am so proud to be a product of this program as this helped me achieved my dream. To all the students who are also beneficiaries of 4Ps, may you not lost hope and strive harder to make your parents proud and live as an inspiration to all students in continually believing that education is for everyone, even to us who came from the poorest families of our society," sumpay sa sulti ni Taghoy.
Abli usab ang buhatan sa DSWD-Davao alang sa pag-inquire sa programa sa ESGP-PA aron mamahimong usa ka child beneficiary kung miyembro na sa 4Ps. (Uban sa taho sa DSWD-Davao)