Gitug-an sa Globe Telecommunications nga nakadawat na sila og opisyal nga pahibawo gikan sa National Telecommunications Commission (NTC) human nga giaprobahan ang hangyo sa Police Regional Office (PRO-7) nga signal shutdown sa telecommunications services atol sa Sinulog Festival.
“Yes, we have officially received the memo from NTC and are preparing to implement as mandated,” pahibawo ni Rofil Manto, corporate communications manager sa Globe for Visayas, Mindanao.
Samtang ang Smart Communications pinaagi ni Lourdes Gocotano nikompirmar nga nakadawat sab sa susamang memo sa NTC, apan wa pa silay opisyal nga pamahayag labot niini.
Apan sa uwahing kalambuan hayan way mapatuman nga signal shutdown human nga dili uyon si Cebu City Michael Rama.
Sa sayo pa, ang NTC nisanong sa hangyo sa PRO-7 sa pagpatuman sa signal shutdown atol sa Sinulog Festival sa Enero 14 – 15, 2023.
Ang maong hangyo gipadala ngadto sa NTC niadtong Disyembre 26, 2022 dungan sa katuyoan sa kapulisan nga masiguro ang seguridad sa publiko, atol sa maong kalihukan nga may kalabutan sa 458th Fiesta Senor Sto. Niño and Sinulog Festival 2023.
Tungod niini, nipadala gilayon og pahibalo ang NTC sa tanang telecommunications companies niadtong Enero 6, 2023 sa temporaryong pagpawong sa ilang tanang network services sud sa nahisgutang duha ka mga adlaw. (LMY)