Diputado: ‘Eskandalo’ sa pari, kagawad

dip
dip

Atong hisgotan ang nahimong “eskandalo” tali sa usa ka pari ug usa ka kagawad.

Nagsugod kining maong isa dihang dihay dakong sunog nga nahitabo dili pa lang dugay ug daghang kabalayan ang naugdaw tungod sa maong sunog.

Gidudahan nga ang sunog gituyo paghimo sa usa ka suspek nga drug addict human sa away tali sa iyang uyab nga parehas sab kaniya nga drug user. Gipangita na karon sa kapulisan ang mga suspek.

Mobalik ta sa giingong “eskandalo.”

Tungod sa pagkaugdaw sa kabalayan, temporaryo nga napugos og puyo ang mga nabiktima sa covered court duol sa barangay hall. Sa pagkakaron, gipangitaan pa og paagi sa kagamhanan og asa sila ibalhin pagpuyo nga permanente na.

Unsa may nahitabo?

* * *

Samtang gilaming sila sa covered court, nagpuli-puli lang pagbisita ang mga gusto motabang sa mga nabiktima, apil na niini ang kanhi pari.

Sa dihang mibisita na ang kasamtangan nga pari sa maong lugar, didto nahitabo ang matod pa, eskandalo.

Ngano man?

Pagkakita sa kasamtangan nga pari sa usa ka kagawad, matod pa, dali kini nga mipabuhagay sa iyang kasuko pinaagi sa pagyawyaw sa kusog nga tingog ug nangutana nganong nagpataka og yawyaw ang kagawad nga mas nauna pa og bisita sa mga biktima ang kanhi pari kay sa kasamtangan nga pari.

Nahitabo kini nga gisaksihan sa daghang tawo, kasagaran mga biktima sa sunog ug silang tanan naamang, wala gyod makatingog, apil na ang kagawad, tungod sa kakalit ug kahikurat sa maong panghitabo.

Mipahawa lang ang pari sa dihang natagbaw na kini sa iyang mainiton nga diskurso ug hilabihan nga kaulaw ug kasakit ang gibati sa kagawad. Gani, naospital gyod ang Kagawad tungod sa maong panghitabo.

* * *

Tungod niini, gisakitan usab ang mga miyembro sa konseho tungod kay matod pa, gawas sa dakong pakaulaw nga gihimo sa pari, dakong sayop sab kini kay wala man gyod maghisgot niini ang kagawad, ilabi na ang mahitungod sa pagbisita sa kanhi pari sa maong lugar.

Human sa ilang diskusyon diin gipahungaw sab nila ang ilang dakong kasagmuyo sa gihimo sa pari, daghang mga plano ang ilang nahimo. Usa na niini ang paghimo og resolusyon nga ideklara nga persona non grata ang maong pari.

Laing plano ang pagreklamo sa gihimo sa pari sa kadagkoan sa Diocese aron maimbestigar ang maong panghitabo tungod kay ngil-ad kaayo kini, ilabi na sa kabataan ug kababayen-an.

Laing plano usab mao ang pagsang-at og kaso nga pakaulaw sa maong pari sanglit sinaksihan man sa publiko ang gihimo sa maong pari.

* * *

Alang kanako, mas maayo nga hisgotan ang maong panghitabo sa mabugnaw nga paagi aron masayran gyod ang kamatuoran diin hatagan og higayon ang Pari nga makapasabot ngano nga nahimo niya kadto batok sa Kagawad.

Mas maayo nga malikayan nga mokuyanap pa ang maong panghitabo og kadtong nakasala o nakahimo sa dili maayo, mas maayo tingali nga modawat sa iyang kasaypanan og mangayo og pasaylo sa nasakitan.

Dili maayo nga pasanayon ang kainit sa huna-huna ug ang kataas sa garbo. Mao kini ang tukmang panahon nga ipakita sa nakasala ang kahamili sa pagpangayo og pasaylo.

Ug ang labing importante, dili maayo nga magbaton og kasuko ang usag-usa sanglit parehas man sila og katuyoan, ang pagtabang sa mga nanginahanglan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph