Ang nag-ung-ong nga plano sa pagputol sa telecommunications signal atol sa pagsaulog sa Sinulog Festival giisip nga “primitive” ug makahatag lang og kahasol sa publiko.
Mao kini ang reaksyon ni Cebu City Mayor Michael Rama human nipagawas og memorandum ang National Telecommunications Commission (NTC) nga nagmando sa tanang telcos nga temporaryong putlon ang ilang serbisyo sa gitakdang oras karong Enero 14 ug 15, 2023.
Gipagawas ang memorandum sa NTC nga pinetsahan og Enero 6 isip tubag sa hangyo ni Police Regional Office 7 Director Brigadier General Jerry Bearis nga ipatuman ang signal shutdown isip security measure.
Apan di pabor si Rama sa signal shutdown sanglit importante kaayo ang komunikasyon alang sa dagkong mga kalihukan sama sa Sinulog festival.
DI UYON
“I have been making a statement before, let us not get into Jurassic (period), like we are being primitive. Communication is very important. Disconnection should always be frowned upon, so let us not think about jamming,” matud ni Rama.
Ubos unta sa memo, ang signal shutdown magsugod sa alas 4 sa kaadlawon hangtod sa alas 10 sa buntag sa Enero 14 alang sa seaborne procession ug kini maglakip sa mga Dakbayan sa Sugbo, Mandaue, ug Lapu-Lapu.
Atol sa solemn procession karong Enero 14, mabara usab unta ang signal sa telco gikan sa alas 12 sa udto hangtod sa alas 8 sa gabii ug kini ipatuman sa downtown ug uptown areas sa Cebu City.
Samtang, ang signal shutdown sa adlaw sa kapistahan sa Enero 15 magsugod usab unta sa alas 5 sa buntag hangtod sa alas 7 sa gabii sa South Road Properties (SRP), lakip na ang downtown area sa dakbayan sa Sugbo.
Si Rama niingon nga dili na kinahanglan nga moluwat pa siya og anunsyo sanglit subli na niyang gisulti kaniadto nga way signal shutdown nga ipatuman atol sa mga kalihukan sa Fiesta Señor ug Sinulog Grand Parade.
IMPORTANTE
Nagtuo ang mayor nga importante kaayo ang komunikasyon atol sa Sinulog tungod kay maglisod ang mga tawo sa pagpangita sa ilang mga kauban, ilabi na sa gipaabot nga daghang mga tawo.
Dugang pa sa mayor nga dili siya ang angay moapelar sa NTC aron hangyuon sa suwat nga balihon ang desisyon niini sa signal shutdown.
Dili usab kinahanglan nga makigtagbo sa Philippine National Police bahin sa isyu sanglit si Bearis niingon na nga ilang isalig ang desisyon bahin sa signal shutdown sa local government unit, matud ni Rama.
Dugang pa ni Rama nga usa ka coordination meeting ipahigayon tali sa Sinulog Executive Committee ug uban pang working groups sa Miyerkules, Enero 11, aron tukion ang nagkalainlaing kabalaka bahin sa kapistahan sama sa venue ug availability sa public transport.
MAG-AGAD
Human nihatag na sa ilang approval ang NTC sa gipangayo nga request sa Police Regional Office 7 pag shutdown sa signal sa telcos atol sa mga kalihukan sa Sinulog, ang hepe sa kapulisan sa Central Visayas mangayo una og guidance kang Rama.
Matud sa hepe sa PRO-7 nga magpaabot sila sa recommendation sa mayor nga maoy ilang sundon, apan nisulti na si Rama nga wa na kinahanglana kay nakapahibawo na si Beares nga siya supak niini.
“Whatever the recommendation of the honorable mayor, we’ll abide with the wisdom of the mayor, so that we can have a very nice celebration for this Sinulog festival,” matud ni General Bearis.
Nipasabot ang heneral nga naandam na ang siguridad sa mga kalihukan sa Sinulog gikan pa sa opening salvo nga mao ang Penitential Walk with Jesus hangtod na sa Sinulog Grand Parade.
Nakahimo na sila og simulation exercises aron masiguro ang kaluwasan sa mga mosaksi sa mga kalihukan sa Sinulog.
SEGURIDAD
Apan gipasabot ni Bearis nga ang tinguha sa pag-shutdown sa signal sa cellular phone kabahin unta kini sa ilang pagpangandam sa siguridad.
“That is a pro active measure, however, whatever the wisdom of the honorable mayor of Cebu City, we will go with it because he knows best,” pamahayag ni Bearis.
Ning nagkaduol na ang seaborne procession, solemn procession ug ang Sinulog grand parade, gipalambo pa sa PRO-7 ang ilang intelligence monitoring aron dili sila malutsan sa mga kriminal nga dunay tinguha nga mosamok sa maong relihiyusong mga kalihukan.
Lakip sa ilang gibantayan pag-ayo ang posibling pagpasulod sa mga kontrabando sama sa ilegal nga drugas nga shabu ug party drugs.