DUL-AN 2,000 ka mga pamilyang apektado sa baha gumikan sa sagunsong pag-ulan ang nakadawat og ayuda gikan sa opisina sa bise gobernador sa Davao del Norte.

Gibutyag nga niadtong Enero 9, 2023, gipahigayon ang pagpang-apud-apod og mga relief supplies ingon man cash assistance ngadto sa mga naapektuhang pamilya sa sagunsong pag-ulan ug pagbaha sa miaging semana.

Mga nabahaan mao ang Barangay San Miguel sa Siyudad sa Tagum nga dunay 400 ka mga pamilya, Barangay Cuambogan sa samang siyudad nga dunay 200 ka mga pamilya, Barangay New Bohol sa lungsod sa New Corella nga 300 ka pamilya, 500 ka mga pamilya sab sa Barangay Misaoy, New Corella ug sa Barangay Poblacion, New Corella nga 300 ka mga pamilya. Mga nahisgutang pamilya nakadawat og relief supplies ug cash assistance.

Gipasalamatan ni Bise Gobernador De Carlo "Oyo" Uy ang opisina ni House Speaker Ferdinand Martin Romualdez, ingon man ang tingog partylist, nga miuban sa pag-apud-apod sa mga ayuda nga nagkantidad og P700,000.

Lakip sab nga gipasalamatan ang opisina sa Department of Social Welfare and Development (DSWD) alang sa mga relief supplies nga gibahin-bahin ngadto sa mga benepisyaryo.