Wala man tuod nakauyon si Brgy. Ginebra Gin Kings coach Tim Cone nga giuswag sa Philippine Basketball Association (PBA) ang pagpahigayon sa deciding Game 7 sa Commissioner’s Cup finals apan dali kining naka-adjust aron itutok ang iyang hunahuna ngadto sa mahinungdanong kombati.

Ang Game 7 nakaeskedyul unta karong adlawa, Enero 13, 2023 apan gumikan sa pursigidong hangyo sa publiko, nakadesisyon ang PBA nga ipahigayon kini karon nang Dominggo, Enero 15, 2023, sa 55,000-seater Philippine Arena sa Bocaue, Bulacan.

Nagkanayon si Cone nga gamiton niya ang pipila ka mga adlaw nga bakante aron estudyohan pa og maayo unsaon pag-alkontra sa makapaukyab nga import sa Bay Area Dragons nga si Myles Powell.

Si Powell nagpakatap og 29 puntos aron agakon ang Dragons sa 87-84 nga kadaugan sa Game 6 nga maoy nakatabla sa best-of-seven series, 3-3.

“We move on, we think about Game 7,” matod ni Cone nga napatik sa www.abs-cbnnews.com.

“I would have preferred it to be Friday. I’m a little disappointed it’s Sunday, but it’s out of our control. So we’ll worry about it on Sunday. That will give our guys, I guess, a little more time to rest. We’ll think about what we’ll do with Powell.”

Si Powell nakamugna og upat ka sagunson nga puntos sa hinapos nga bahin sa Game 6 nga maoy nag-abli og pultahan sa Dragons paingon sa kadaugan.

Nakapasulod sab si Powell og duha ka krusyal nga freethrows sa nahabiling pito ka mga segundos.

“We’ll look at it, rethink it,”dugang ni Cone.

Sa tan-aw ni Cone, grabe na ang ilang depensa ngadto kang Powell apan kuwangan pa ug kinahanglan pa kini nilang pahugtan.

“We have time now,” asoy ni Cone. “We didn’t have time, we had like 45 minutes to set the game plan for him in our last practice. So hopefully, we’ll have a little more time, and think what we’re doing about it. Look at him a little bit.”

Gipasabot ni Cone nga nakalitan sila sa duwa ni Powell gumikan kay wala kini nagduwa dihang ilahang gikaharong ang Dragons sa elimination round.

“We haven’t experienced him before, we didn’t play him in the elims. So this is the first time we had him tonight,” pasabot ni Cone.

Si Powell wala nagduwa gikan pa niadtong Nobiyembre 23, 2022 tungod sa angol sa iyang tiil apan gi-reactivate kini sa Dragons aron ipuli sa naangol nga si Andrew Nicholson.

Game 6 boxscores:

Bay Area (87) – Powell 29, Blankley 23, Yang 10, Zhu 10, Lam 9, Liu 4, Reid 2.

Ginebra (84) – Brownlee 37, J.Aguilar 12, Standhardinger 12, Thompson 8, Pringle 8, Malonzo 4, Pinto 3. / ESL