Rama: SRP final na gyud

SI CEBU City Mayor Michael Rama hugot nga nibarog sa iyang desisyon nga ipahigayon ang Sinulog Festival grand parade ug ritual showdown sa South Road Properties (SRP) karong Enero 15, 2023.

Sa press conference sa Biyernes, Enero 13, wala matandog si Rama sa mga pamahayag ni Gobernador Gwendolyn Garcia niadtong Huwebes sa gabii, Enero 12, nga 10 ka contingents ang mo-withdraw sa ilang partisipasyon sa grand parade ug ritual showdown kon ang kalihukan ipahigayon sa SRP.

Ang SRP gisaway tungod kay “dili andam” alang sa kapistahan. Sa Biyernes, nagpadayon ang pagtrabaho sa konstruksyon, duha ka adlaw sa dili pa ang pista.

Rason ni Rama nga ang Sinulog Festival nga gipahigayon sa downtown areas sa miaging mga tuig nakahatag og “grabeng kalisang” sa kapulisan, organizers, ug Kagamhanan sa Dakbayan.

Kon ang festival naa sa orihinal nga lugar niini, ang mga awtoridad kinahanglan nga mabalaka bahin sa posibilidad nga adunay stampede tungod sa gipaabot nga daghang mga maghudyaka.

Ang street parties maoy laing rason nganong supak si Rama sa pagpahigayon og kapistahan sa downtown area sanglit managhan ang mga tawo sa kadalanan ug makamugna og kasamok.

Dili usab bag-o ang ideya sa pagpahigayon sa kapistahan sa SRP sanglit nahisgutan na kini bisan pa sa termino ni kanhi mayor Tomas Osmeña, matod ni Rama.

Apan niadtong panahona dili pa andam ang SRP tungod kay walay igong road networks ug wala pa ang malls, hotel, ug uban pang mga establisemento, dugang niya.

Si Rama niingon nga bisan gamay ra ang mga contingent nga mopasundayag sa Dominggo, dili kini makapakunhod sa kahulogan sa kapistahan diin nag-unang tumong mao ang pagpasidungog sa Senyor Santo Niño.

“Sinulog will still be Sinulog and that is the most important thing. But if the Province would want to be a part then it can add up but it would not reduce the meaning of Sinulog because Sinulog is venerating the Sto. Niño,” matod ni Rama.

Si Garcia, niadtong Huwebes sa gabii, Enero 12, nipahibawo sa pag-atras sa Kapitolyo ug sa 10 ka contingents, duha niini nagagikan sa Dakbayan sa Lapu-Lapu ug Mandaue, kay wa sila nakauyon sa lugar nga nahimutangan sa grand stage kay lapukon ug wa pa maandam.

Di kompetensya

Dili “bitter” ug way planong makigkompetensiya si Garcia sa kasaulogan sa Sinulog 2023 nga pinangulohan sa Kagamhanan sa Dakbayan sa Sugbo.

Kini maoy giklaro ni Garcia atol sa pakighinabi sa mga tigbalita sa Enero 13, 2023 human siya nakahukom nga adto sila moapil sa ika 50 ka tuig nga Sinulog sa lungsod sa Carmen, amihanang Sugbo sa Enero 22.

“I do not mean any rancor, wa ko’y bitterness sa akong kasingkasing. Wala ko’y buot nga duna ko’y masilo ang ako lang nga buot gyud masabtan sa tanan, I am just answering to my duty as a governor. Ang akong responsibility bug-at lang kaayo kaysa uban pang konsiderasyon,” matod ni Garcia.

Matod sa gobernador nga dili na matawag nga One Cebu Island Sinulog 2023 ang kasaulogan karong tuiga apan Sinulog 2023 sa dakbayan sa Sugbo na lang ang angay gamiton.

Subay usab kini sa final na nga decision sa Kagamhanan sa dakbayan sa Sugbo sa pagpahigayon sa Sinulog 2023 sa SRP.

Hugot na usab ang desisyon ni Garcia nga dili na pasayawon ang siyam ka contingents sa Sinulog sa siyudad karong tuiga.

“While I apreciate greatly nga for the first time ang tawag sa Sinulog One Cebu Island Sinulog. We are grateful to Mayor Mike for having come up to this very unifying idea. Pero maybe not this time lang. Not necessarily for all other events and all other endeavors but for this Sinulog. Maybe I had to spell out reality that it cannot be a One Cebu Island Sinulog. Because One Cebu Island consist of the LGUs of the Province of Cebu and the tri-cities,” matod ni Garcia.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph