SI INTERIOR and Local Government Secretary Benhur Abalos Jr. niingon sa Biyernes, Enero 13, 2023, nga ang mga ngalan sa police colonels ug heneral nga makit-an nga nalambigit sa illegal drug trade atol sa pagpahigayon sa evaluation sa independent committee pagatagdon nga confidential.

Sa press conference sa Camp Crame, si Abalos niingon nga dili na kinahanglan nga ipublikar ang mga ngalan sa mga opisyal sa kapulisan kansang courtesy resignation dawaton tungod sa giingong kalambigitan nila sa illegal drug trade.

“This is a radical move. Kamukha ng sinasabi ko extraordinary times calls for radical and bold actions. This is out of the box, in the same token let’s say kung may matanggap kang resignation, let them retire silently,” matod niya.

“Ngayon if we have enough evidence that would build up criminal cases, pursue them in court as mandated by law. If not, kung wala ka naman ganun katibay pero nakita talagang may involvement, let them retire peacefully,” dugang ni Abalos.

Matod pa ni Abalos nga magpadayon ang monitoring ug imbestigasyon batok kanila, nga mahimong moresulta sa pagpasaka og kaso, taliwala sa tinguha sa kagamhanan sa pagwagtang sa ilegal nga drugas sa nasud.

Sa Biyernes sa buntag, niabot na sa 904 sa 953 -- uban ang 774 ka police colonels ug 130 ka heneral -- ang nisumiter sa ilang courtesy resignation.

Ang tigpamaba sa PNP nga si Colonel Jean Fajardo niingon nga ang kinatibuk-ang ihap sa mga opisyal sa ikatulo nga lebel mikunhod gikan sa 956 ngadto sa 953 tungod sa pagretiro.

Si Abalos mihimo sa panawagan niadtong Enero 3 human nasuta, human sa pagkasikop sa usa ka police anti-drug operative nga nakuhaan og duha ka kilo nga methamphetamine hydrochloride (shabu), nga daghang police officials, nga nag-okupar sa mga importanteng posisyon sa PNP, nalambigit sa ilegal nga kalihukan.

Matod ni PNP Chief Rodolfo Azurin Jr., labing menos 10 ka mga police official ang naa sa listahan apan wala pay impormasyon kon nakasumite na sila sa ilang courtesy resignation.

Ang lima ka tawo nga komite nga gilangkuban sa mga halangdong indibidwal, lakip si Baguio City Mayor retired general Benjamin Magalong, motan-aw sa posibleng kalambigitan sa mga opisyal sa ilegal nga drugas.

Matod ni Abalos nga isumiter sa komitiba ngadto sa National Police Commission (Napolcom) ang mga ngalan sa mga opisyal sa kapulisan nga nasuta nga dunay kalambigitan sa drugas alang sa laing hugna sa pagsusi sa dili pa moduso og rekomendasyon ngadto kang Presidente Ferdinand “Bongbong” Marcos Jr.

“I’d rather have one man whose guilty get off the hook than one innocent person be dismissed. Importante sa akin yun, salang sala. So we added one more, Napolcom. So ang mangyayari from this 5 man committee, hahanapin itong let’s say na matatanggap na 10. yun lamang 10 yun will undergo another process of review dito sa Napolcom,” matod niya. (TPM sa SunStar Philippines)