USA na ka Filipino citizen ang resident import sa Brgy. Ginebra Gin Kings nga si Justin Brownlee human gipirmahan ni Presidente Ferdinand “Bongbong” Marcos Jr. ang naturalization papers niini.

“Yes. I am so glad that President BBM signed Republic Act 11937,” matod ni Senator Francis Tolentino nga napatik sa www.gmanews.tv.

Si Tolentino maoy usa sa principal authors ning maong balaod. Sa miaging buwan, giaprubahan sa Senado ang House Bill 6624 sa ikatulo ug final reading nga wala’y bisan gamay nga giusab sa bersyon nga gikan sa lower chamber.

Gipaspasan ang paglihok sa naturalization process ni Brownlee gumikan kay giplanuhan kining ilakip sa puwersa sa Gilas Pilipinas nga mokombati sa Lebanon ug Jordan alang sa ikaunom ug final window sa FIBA World Cup Asian Qualifiers karong Pebrero, 2023.

Makaduwa na sab si Brownlee sa Gilas Pilipinas sa mismong FIBA World Cup nga ipahigayon karong Agusto, 2023 diin co-host ang Pilipinas kauban ang Japan ug Indonesia.

Sa kasamtangan, si Brownlee nagduwa sa Ginebra sa Philippine Basketball Association (PBA) Commissioner’s Cup finals series batok sa Bay Area Dragons nga niabot og deciding Game 7.

Ang gikahinamang winner-take-all nga duwa ipahigayon ugma, Enero 15, 2023, sa 55,000-seater Philippine Arena sa Bocaue, Bulacan. (ESL)