Di malikayan ang mga higayon nga magrabihan ta pagka-igo sa mga bagyo sa kinabuhi unya ang di isog moatubang ug makigkumbati ini maluya gyod unya ang uban matulirok ang utok o makahuna-huna og pakamatay sa dayon.
Apil sa listahan sa kumon nga mga pagsuway mao ang pagkabuslot sa bulsa, gutom ang tiyan ug sakit sa dughan tungod sa pagkabungkag sa relasyon.
Diay mga leksyon nga akong nakuha pagbatok ining mga pagsuway sa kinabuhi gikan sa libro nga “13 Things Mentally Strong People Don’t Do” nga ako sang ipa-ambit kay nindot kining palandungan para makalahutay sa mga pagsuway.
Una, ayaw usik-usiki imong panahon sa pagsegi og kaguol ug huna-huna sa mga nangaging sipyat o sayop nga mga desisyon o ba kaha kon giunsa ka pagtratar sa uban. Angay hinuon hinuklogan ang mga leksyon nga nakuha og dawaton ang kamatu-oran nga kita tawo lang nga panagsa makasala o masayop.
Ang mga tinuod nga isog di modagan o magpalayo kon dunay mga kausaban nga moabot sa ilang kinabuhi. Hinuon, hangupon ini kon dunay mga positibong kausaban nga mahitabo. Kasabot ni sila nga ang kausaban di gayod mapugngan unya makaya ra sa ilang abilidad, kinaiya ug kahimanan ang pag-adjust ini.
Kini sila di sab magpunay og himo og mga butang o kalihukan para lang maka-palipay sa uban. In other words, di ni sila ‘people pleaser’. Di ni sila mahadlok mosulti sa ilang huna-huna kon gikinahanglan apan maningkamot hinuon ni sila nga patas ang dinad-an ug tinagdan unya maayo sab ang pagtagad ngadto sa uban. Di kaayo ni sila maapektuhan o maguol kon di ni sila matagad o mapansin pagbalik.
Di sab ni sila magselos sa kalampusan sa uban. Hinuon, modayeg ug moduyog kini sa kalipay. Di kini masuya o masakitan kon maapsan kay sa ilang huna-huna ug kasing-kasing ang kalampusan makuha kon tinu-oray kang maningkamot para sa imong kaugalingong kalampusan.
Di sab ni sila mahadlok mag-inusara kay di ni sila magsalig sa uban para lang naay makauban o para naay makahatag og kalipay nila.