Nagpasalamat ang mga atleta sa University of Cebu (UC) kang school president Atty. Augusto Go tungod sa suporta nga gihatag niini sa ilang pagsalmot sa bag-o lang natapos nga PEKAF Arnis Visayas Qualifying Tournament ug Batang Pinoy Championship.
Ang UC Arnis Team nakuha og 10 ka bulawan, siyam ka pilak ug walo ka bronse sa PEKAF Arnis Visayas Qualifying nga gipahigayon sa Sugbo.
Mitapos sa ikatulong luna ang UC arnis team luyo sa Team Cebu City (22-9-15) ug Minglanilla Arnis Team (12-10-15).
Mi-courtesy call ang arnis team sa opisina ni Go lakip na ang badminton team, swimming team, track and field team ug chess team uban ni UC athletic director Jessica Jawad Honoridez.
Ang UC mipakita pud og labok sa 2022 Batang Pinoy didto sa Vigan, Ilocos Sur.
Ang mga atleta sa chess, swimming track and field, weightlifting ug badminton miani og tulo ka bulawan, walo ka pilak ug walo pud ka bronse sa national nga torneyo.
Ang chess player nga si Maria Kristine Lavandero maoy misidlak pagmaayo, mibulsa siya og duha ka bulawan og dula pud ka pilak sa chess girls’ U15.
Samtang si Ellaikha Marie Canillo nahimong kampiyon sa badminton girls’ singles.
Batbat ni Honoridez nga dako ilang pasalamat kang Atty. Go sa gihatag niini nga suporta sa pagbalik sa mga liga human sa pila ka tuig nga pagkahunong tungod sa Covid-19 pandemic.
Malaumon si Honoridez nga mas molambo pa ang mga atleta ug mas maayo ang ipakita sa mga torneyo karon nga 2023 season. (RSC)