Nagpadayon sa ilang dominanteng duwa ang Memphis Grizzlies ug gipuno nga biktima ang Indiana Pacers, 130-112, Dominggo, Enero 15, sa Indianapolis aron inaton ang ilang winning streak sa siyam ka mga duwa sa National Basketball Association (NBA).
Ang batan-ong All-Star guard nga si Ja Morant maoy mitimon sa Grizzlies ngadto sa kadaugan pinaagi sa iyang 23 puntos ug 10 ka assists lakip na niini ang makabungog nga highlight dunk nga hingpit mipalubog sa kadasig sa Pacers.
Si Desmond Bane maoy katambayayong ni Morant nga adunay 25 puntos.
Misulbong gyud ang karera sa Memphis karon nga season, nagtabla na sila sa Denver Nuggets alang sa pinakanindot nga rekord sa Western Conference bitbit ang 29-13 (win-lose) nga baraha.
Gisamaran na daan sa Memphis ang Indiana ug igo nalang gipapupos ang oras sa fourth quarter kay nakaposte naman kini og dako nga labaw sa third quarter pa lang.
Ang poster dunk ni Morant batok kang Jalen Smith maoy nakahatag og 20 puntos nga labaw sa Memphis sa nahabiling 4:20 sa third quarter. Ang Memphis mitali sa ilang pinakadako nga labaw nga 34 puntos sa fourth quarter.
Ang Grizzlies nakakuha pud og dakong kontribusyon sa ilang role players. Si Santi Aldama nitunol og 17 puntos samtang si Ziaire Williams niamot og 13.
Si Chris Duarte adunay 25 puntos alang sa Pacers, samtang ang rookie nga si Bennedict Mathurin nihatag og 16 ug si T.J. McConnell adunay 13.
Miduwa ang Pacers nga wala ang ilang duha ka starting players nga sila si Tyrese Haliburton ug Myles Turner.
Ang point guard nga si Haliburton, ang leading sa Indiana ug NBA assist leader, di makaduwa sulod sa duha ka semana tungod sa left elbow strain ug left knee contusion; samtang ang big man nga si Turner, kinsa ga-average og 17 puntos, wa makaduwa tungod sa back spasms.(RSC)