Mipakita sa ilang katakos ang Pinoy players aron dalhon sa kadaogan ang Asia All-Stars batok Rising Stars, 118-114, sa Japan B. League All-Star Game sa Mito Arena sa Japan.
Lima ka Pinoy imports sa Japan ang ningmugna og double figures sa scoring pinangulohan ni Matthew Wright nga adunay 14 puntos ug siyam ka rebounds.
Si Kobe Paras sa team Altiri Chiba ug Greg Slaughter sa Fukuoka mikamada og 12 puntos matag-usa, samtang si Bobby Ray Parks Jr. sa Nagoya ug si Jordan Heading sa Nagasaki mihimo og 11 puntos.
Ang final basket ni Weijia Wang maoy nisilyo sa kadaugan sa Asia All-Star. Mitapos si Wang sa duwa nga adunay 18 puntos.
Matod ni Thirdy Ravena, ang unang Pinoy player sa B. League, nga malipayon siya sa oportunidad nga makaduwa sa liga labi na karon nga wa na siya mag-solo kay daghan nang Pinoy ang gaduwa sa Japan. (RSC)