Mga ‘notadong’ kawatan gikan sa Luzon ug taga dakbayan sa Ormoc ang gipangsignit sa mga sakop sa Cebu City Police Office (CCPO) ug Regional Intelligence Division sa Police Regional Office (PRO) 7 human namiktima sa mga langyaw nga turista nga misaksi sa Sinulog grand parade sa South Road Properties (SRP) kagahapon, Enero 15, 2023.
Matud ni Police Lieutenant Colonel Gerard Ace Pelare, tigpamaba ni Police Brigadier General Jerry Bearis, nga ang 13 nga nadakpan, walo niini mga babaye, gituohan nga grupo kini sa mga mangunguot gikan sa laing lugar sa Pilipinas.
Ila na kining gipangandaman tungod sa impormasyon nga mangigo gyud sila sa dakbayan sa Sugbo atol sa mga kalihukan sa Sinulog.
Sa pagkakaron, wala lang una hinganli sa kapulisan ang mga pangalan niini tungod kay duna pay mga kauban nga ilang gipangita.
Sunodsunod nga nidangop ang mga biktima sa gimontar nga Multi-Agency Coordinating Center (MACC) sa SM Seaside nga sila nakawatan sa ilang mga cellular phones ug kwarta samtang nalingaw sa pagsaksi sa mga nanayaw nga mga contingent sa Sinulog.
Buntag pa lang nakatala na sila og kapin sa napulo ka mga kaso sa pagpanguot nga ningreklamo sa sector commanders.
“Diha toy nag-report sa MACC since this morning, the RD the Task Force Commander was here to monitor, nakita nato nga dihay victims most of them foreigners, then subsequently nag-adjust we were able to arrest the suspects,” matud ni Pelare.
Gipaubos karon sa imbestigasyon sa kapulisan ang 12 ka mga kawatan tungod sa pagtuo nga daghan pa ang kaubanan nga wala pa madakpi.
Gibutyag ni Pelare nga dali ra sila nadakpan sa mga nakasibilyan nga pulis tungod kay naka-confine lang sa usa ka dapit ang Sinulog dili susama sa uptown area sa dakbayan sa Sugbo nga daghan sila og katagoan.
Dunay kapin sa 20 ka mga closed-circuit television (CCTV) camera ang gipangtaod sa rota nga maoy hinungdan nga dali ra nila nga makit-an ang mohimog krimen.
Kasagaran sa mga nadakpan duna nay mga kaso sa pagpangawat sa laing lugar sama sa Ormoc ug sa Metro Manila.
Si Police Brigadier General Jerry Bearis, pangulo sa Police Regional Office (PRO) 7, natagbaw sa seguridad nga gipatuman sa iyang mga tawo nga hugot niya nga gi-monitor sukad pa sa buntag hangtod nga natapos ang Sinulog grand showdown sa SRP.
Iyang gipasalamatan ang ubang ahensya sa gobyerno nga miabag sa siguridad bisan pa man sa nasinating kainit sa SRP nga wala mohawa sa ilang gitahas nga lugar.
Gihulagway niya nga malinawon sa kinatibuk-an ang kalihukan sa Sinulog karong tuiga nga walay dagkong mga insidente nga natala gawas sa mga kaso sa kawat nga normal sa mga dagkong kalihukan.
“Kaya naging peaceful ito its because of the concerted effort of those government agencies, private sectors and other stakeholders. And of course, yung mga tao natin na nag-participate dito, yung mga devotees natin, I'm very thankful,” matud ni Bearis.
Moabot sa 6,000 ka police personnel ang gipakatap sa rota sa Sinulog lakip na niini ang ubang ahensya sa gobyerno sama sa Philippine Coast Guard, Bureau of Fire Office, Philippine Army, Philippine Navy, Philippine Air Force ug mga department sa Cebu City Hall sama sa Cebu City Traffic Office (CCTO) ug City Disaster Risk Reduction and Management Office (CDRRMO).
Si Police Police Colonel Ireneo Dalogdog, hepe sa Cebu City Police Office (CCPO), nimando sa pagka hapon na nga patutukan ang mainland sa dakbayan sa Sugbo tungod sa pagdagsa sa mga tawo labi na sa uptown area sama sa Mango Avenue ug ang Juana Osmeña.
“Akong gipatutukan ang mainland Cebu City kay nagkadaghan na ang mga tawo didto, naa natay mga personnel nga mobantay aron malikayan ang kagubot,” matud ni Dalogdog.
Bisan pa man sa kamandoan ni Cebu City Mayor Michael Rama nga idili ang street party, apan daghan ang nag- inom sa kilid sa karsada.
MGA LANGYAW
Lima ka mga langyaw ang pulos nabiktima sa pagpanguot sa Barangay Mambaling, Siyudad sa Sugbo atol sa kalihukan sa Sinulog Grand Parade alang sa kapiyestahan sa Señor Santo Niño ning tuiga.
Unang nitaho sa pulis mao si Alison Louise Westbrook, 57, taga United Kingdom (UK), nawad-an og iPhone Mini 13 nga balor og 52,000.
Ikaduhang nitaho mao Li Tat Lan Li-Ying, 64, French national, nawad-an usab og cellphone nga dunay upat ka sim pack.
Ang ikatulo mao si Riho Izumi, 25, Japanese national, nadagit ang iyang iPhone 11 nga nagkantidad og P44,000.
Ang ikaupat nga nabiktima mao si Daisuke Tanaka, 33, Japanese national, nadagit gikan kang Tanaka usa ka pitaka nga dunay sulod P3,000.
Ikalima mao si Alexandrea Maye Pike-Goff, 25, American national, nakuha sa biktima ang mga importante nga mga butang sa mga langyaw nga mga nabiktima sa pagpanguot.
Ang kapulisan sa Mambaling naningkamot sa pagdakop niining mangungoot. (AYB, BBT)