Ang Cebu Port Authority (CPA) mipapilit na og mga tarpaulin sa Compania Maritima nga mabasa ang writ of preliminary injunction (WPI) nga giisyu sa Regional Trial Court niadtong Disyembre 23, 2022.
Ang duha ka pahina nga WPI nga giisyu ni Atty. Perpetua Socorro Enriquez-Belarmino, clerk-of-court sa RTC-7, giplastada luyo sa Christmas tree ug makita sa mga moagi paingon sa South Road Properties (SRP).
Ang laing kopya gibutang sa karsada buyon sa Compania Maritima. Ang Siyudad sa Sugbo ug CPA nag-ilugay sa ilang katungod pagdumala sa Compania Maritima.
Ang korte pinaagi sa sala ni Judge Soliver Peras sa Branch 10 sa Regional Trial Court (RTC) sa dakbayan sa Sugbo ni-grant sa WPI nga gipangayo sa CPA.
Gumikan niini, nabalik sa CPA ang statutory rights sa Compania Maritima ug ang City Government gimanduan sa dili paggamit ug pag-okupar sa edepisyo ug pagpahunong sa construction.
Ang luna palibot sa Compania Maritima apil sa joint venture agreement sa City of Cebu ug Megawide Development Corporation alang sa Carbon Market Modernization.
Makita palibot sa Compania Maritima ang nagpasad nga mga basura nga salin sa kasaulogan sa Fiesta Señor ug aduna say street dweller nga natulog nga nagtabon og payong sa iyang paghigda.
Sa wala pa ang WPI, ang C2W maoy nag-maintain sa dapit, nagpanindot sa Compania Maritima, nag-landscape sa sidewalk ug nagsemento sa palibot sa karaang edepisyo aron mawala ang lapok. Sila sab ang nagtukod sa Puso Village nga karon wala pa magamit bisan kon nahuman na ang construction.
Ang kawani sa C2W nga wala lang magpahingalan nagkanayon nga sukad nigawas ang 15 ka pahina nga injunction gikan sa korte, wala na sila nihilabot sa propiedad ug nipahunong sa ilang development kapin sa 20 na ka adlaw ang nakalabay. (PAC)