Nihatag sa ilang kinatibuk-ang suporta ang Papua New Guinea Sports Foundation alang sa giplano nga exhibition bout tali nila ni Filipino boxing legend Manny Pacquiao ug kanhi world champion Australian Anthony Mundine.
Si PNGSF executive director Al Veratau nagkanayon nga buhaton nila ang tanan aron madayon ang away, nga giplanuhang ipahigayon karong Hunyo, 2023.
“The Papua New Guinea Sports Foundation is partnering with the Oceana Fight Promotions to make sure we deliver the Manny Pacquiao-Anthony Mundine exhibition bout in Port Moresby,” batbat ni Veratau nga napatik sa www.fightnews.com.
“We’ve asked the Government to invoke the National Events Council to assist because it is a huge event in the 2023 sports calendar.”
Kon mahinayon, nagkanayon si Australian advisor Peter Maniatis nga mao kini ang labing dakong kalihukan sa paugnat sa kusog nga mapahigayon sa Papua New Guinea.
“This will be the biggest global sporting event in the history of Papua New Guinea. Well done to the PNG Government and Maryanne Millie Oceania Fight Promotions,” asoy ni Maniatis.
Si Mundine kaduha nakalabni sa World Boxing Association (WBA) super middleweight title niadtong 2003 ug 2008.
Usa sab ka kanhi rugby league footballer si Mundine. / ESL
