Sa dihang miatubang sa mga sakop sa local media, ang Ogar (Office of Government Accountability and Review), aron pagtaho sa ilang nahimo o himuon kalabot sa ilang mandato ubos sa pamunoan ni Governor Aris Aumentado, nahibaw-an nga ang unang lakang nga himuon sa Ogar ang pagpasaka og kaso administratibo sa usa ka kasamtangan nga empleyado sa Kapitolyo. Daghan ang nakugang. Ngano nga siya ra man?
Daghan ang nagtuo nga ang unang kasohan mao ang gituhoan nga ulo o mastermind sa pangurakot sa salapi sa probinsiya, apil ang iyang mga hinanib o alipores. Kon ang kasohan usa ka kasamtangan nga empleyado sa Probinsiya, nagpasabot nga dili kining tawhana ang gituhoan sa katawhan nga ulo o mastermind.
Daghan sab ang nagtuo nga kaso kriminal o kaso nga pangurakot ang kaso nga ipasaka, dili kay kaso administratibo lang.
Buyno, wala magpasabot nga dili na siya makasohan og kasong kriminal bisan sa pagpasaka sa kasong administratibo. Mahimo gihapon siya nga makasohan, depende sa ebidensiya nga makita sa OGAR.
* * *
Makita dinhi nga doble ang gihimong pag-amping sa Ogar sa ilang gihimo nga pakisusi sa mga rekord sa nakalabay nga administrasyon ni kanhi Gov. Art Yap. Kon alang-alangon lang nila ang ilang kaso nga ipasaka bisan kon huyang ang ebidensiya, sila ra pod ang maulawan.
Gawas pa sa isyu nga pag-usik-usik sa salapi sa katawhan isip budget sa operasyon sa Ogar.
Makita sab dinhi nga bisan sa mga panahon nga nakalabay ug ingon man ang kasayon sa pagkuha sa mga dokumento nga ilang ukayon ug susihon, kay mahimo man nila ipatawag ang mga opisyal nga naghupot niini, dili diay gihapon sayon alang sa Ogar ang paghupot sa bug-at nga mga ebidensiya.
Sa minarama nga pagkasulti, maayo diay pagkahimo ang mga krimen sa mga asa nakalabay nga administrasyon.
* * *
Ang pangutana nga gimatuto sa katawhan mao kini - kinsa man diay ang una nga angay kasohan, ang ulo o ang mga gaway lang? Kon unahon ang mga gaway, pwede sab pero dili kaayo bug-at ang epekto niini sa kampanya kontra pangurakot sanglit masabot man sa katawhan nga napugos lang ang mga gaway pagtuman sa sugo sa ulo sa tinunto. Kinsang tawhana, labi na kon ubos ra kaayo og ranggo, ang makabalibad sa sugo sa iyang amo nga ipabuhat ang usa ka butang bisan supak sa iyang kabubut-on? Naa ra sa tumoy sa ballpen ang sumpay sa iyang panginabuhi, ug seguradong makulban siya sa kaldero kon di motuman sa sugo.
Kon unahon ang ulo sa mga tinunto, bug-at kini og epekto gawas pa sa klaro nga intensiyon nga seryoso gyod ang pag-gukod sa mga kurakot. Diha magsugod ang pangurakot sa ulo o sa mastermind sanglit sila man ang naa sa katungdanan o posisyon.
Ang hustong tubag niining tanan naa lang sa OGAR, sanglit sila man ang gitahasan nga maghimo og pakisusi ug pagtuon kalabot niini.
* * *
Ang rekomendasyon sa OGAR, matod pa, ilang ipadangat ngadto sa opisina sa gobernador diin mahimo nga ipasa na sab kini sa laing grupo nga maoy mohatag og rekomendasyon ngadto sa gobernador sa lakang nga pagahimuon.
Medyo taastaas nga proseso pa ang pagahimuon usa pa makakita ang katawhan sa aktuwal nga kaso nga ipasang-at batok sa mga malapason. Kon mao kini, mora diay kini og adunay Ogar 1 ug Ogar 2.
Ang gikahadlokan sa katawhan mao kini - dili ba kaha maabtan og siyamsiyam ang pagpasaka og kaso batok sa mga kurakot sa nakalabay nga administrasyon?
* * *
Usa ka kurakot nga pulitiko nagminaro sa pag-gunit sa iyang nakurakot nga minilyon, imbes iyang tagoan sa bangko, didto lang niya kini tagoi sa usa niya ka balay.
Nagbuntaog ang mga binandol nga kwarta nga mokabat sa sobra sa P200 milyunes.
Bisan sa kadaghan na sa iyang nakikik, sama sa walay katagbawan ang maong pulitiko, way undang ang iyang paghakot sa mga binandol nga salapi.
Miabot pa bitaw si Odette.
Ang resulta - gibaha ug gianod sa baha ang mga binandol nga salapi nga matod pa, sobra sa P200 milyunes ang nawagtang sa baha.
Nahitabo kini sa dihang wala diha ang politiko sa iyang balay ug maoy hinungdan nga wala masalbar ang mga binandol nga mga kwarta.
Mirisi, matud pa sa nabiktima.