Sa dugay nang katuigan, kining Sinulog-Santo Niño Festival kun Fiesta Senor, usa ka cultural ug relihiyusong kalihukan, giselebrar matag tuig sa dakbayan sa Sugbo apil sa nadungog na kaayong street parties kon mardi gras. Bisan kon anaay daghang dapit nga nagsaulog usab sa ilang vesion sa sinulog apan ang hudyaka sa Cebu City maoy giila nga “Grandest Festival in the Philippines. Bisan kon kini gidumala sa Sinulog Foundation, Inc. nga usa ka pribadong kahugpongan apan hugot kining gipaluyohan sa Kagamhanan sa Cebu City ug Kapitolyo.
Wala ako makasaksi sa Sinulog 2023 tungod sa ika-30 ka tuig nga kasumaran sa kaminyuon sa usa sa akong mga anak nga gihimo ang renewal of marriage vows sa Seoul, South Korea. Pipila ka mga bisita nga gikan usab dinhi sa Pilipinas ang dili gayud mosipyat pagpangutana kon nganong wala mosalmot ang pipila ka mga siyudad ug kalungsoran sa gitawag nga One Cebu Island Sinulog 2023. Ang akong matubag mao ra gayud ang akong nasayran sa dihang wa pa ako mobiya padung sa South Korea.
Nagkalainlain ang pangagpas sa mga Pilipino nga nagsunod sa kalihukan sa Sinulog diin kadaghanan niini nagtuo nga politika ang hinungdan. Nagtuo sila nga nag-ilog sila si Gobernador Gwen Garcia ug si Cebu City Mayor Mike Rama sa liderato sa tibuok Cebu.
Aduna koy pipila ka obserbasyon sa akong hamubong pagbiyahe sa South Korea. Ang atong Mactan Cebu International Airport dili kaayo mabiyaan sa kadako ug kaanindot sa Incheon Airport. Mas sayon hinuon ang pagsakay og bus gikan sa Incheon padung sa nagkalainlaing dapit sa Seoul.
Mas disiplinado ug dili modawat og tip ang mga empliyado sa airport nga imong pangayoan og tabang. Mao usab ang mga impliyado nga anaa sa mga estasyon sa mga bus nga motabang sa pagdala sa imong bagahi sa haduol nga hotel. Dili mabintahaan ang kaanindut sa mga tourist areas sa Sugbo apan maayo lang gayud pakahan-ay ang sa South Korea.
Sa Myeongdong Shopping Street sa Seoul imong makita ang nagkalainlaing brand name shops ug department stores nga namaligya sa hapit tanang butang. Apan bisan tuod og gamay ra kaayo ang bili sa ilang salapi nga South Korean Won, apan dili barato ang palaliton sa maong dapit. Dili ka maglisud sa pagpangita sa tindahan nga buot nimong adtoan kay nay Tourist Information Officers nga nagsuroysuroy sa kadalanan aron pagtabang sa mga turista. Kini maoy gikinahanglan kaayo nato dinhi. (mannyrabacal1144@yahoo.com)