Gibasura sa Department of Justice (DOJ) ang kasong murder batok sa 17 ka mga pulis nga ning-apil sa dungan nga operasyon sa kapulisan nga giilang “Bloody Sunday” (Maduguong Dominggo).
Sa desisyon nga gipakanaog ni Senior Assistant State Prosecutor Rodan Parrocha, siya nagkanayon nga ang reklamo nga gisang-at ni Liezl Assuncion, asawa ni Emmanuel, usa sa siyam ka mga indibidwal nga napatay atol sa maong operasyon sa nagkadaiyang dapit sa Calabarzon niadtong Marso 7, 2021, walay igong ebidensiya aron pamatud-an nga dunay nahitabong krimen.
“We lament the demise of Emmanuel Asuncion. However, the complainant and the evidence she submitted failed to discharge the obligation to prove the existence of a crime and identify the perpetrators thereof,” mabasa sa hukom.
“In the absence of proof, there could be no probable cause to charge the respondents,” kini nidugang.
Ang desisyon nagmando nga ang mga rekord ibalik sa National Bureau of Investigation alang sa pagpahigayon sa dugang nga imbestigasyon.
Ang mga respondent sa kaso mao sila si Lieutenant Elbert Santos ug Shay Jed Sapitula; Senior Master Sergeant Hector Cardinales; Master Sergeant Ariel Dela Cruz, Staff Sergeant Jemark Sajul, Corporal Ernie Ambuyoc, Corporal Mark John Defiesta, Corporal Arjay Garcia, Corporal Caidar Dimacangun, Corporal Bryan Sanchez, Corporal Ericson Lucido, Patrolman Jayson Maala, Patrolman Juanito Plite, Patrolman Jonathan Tatel, Patrolman Prince Benjamin Torres, Patrolman Jaime Turingan, ug Patrolman Rey PJ Dacara Lopera.
Niadtong Miyerkules, Enero 18, 2023, ang mga miyembro sa labor and rights group nagpahigayon og piket nga protesta atubangan sa buhatan sa DOJ sa Manila samtang ilang gikondena ang desisyon.
Si Asuncion niingon nga ang mga sumbong “whitewashed.”
Isip tubag sa mga akusasyon kaniya, si Justice Secretary Jesus Crispin Remulla niingon nga wala pa mahuman ang kaso kay nagkinahanglan lang kini og dugang ebidensiya aron makabarog sa korte.
“They still have to make a better case build-up to be able to file a case that we can prosecute in court, kasi it’s useless to file a case kung hindi rin namin mapoprosecute. Bigyan pa ng panahon para makahanap pa ng ebidensya,” matud niya sa interview tali sa mga reporter.
“They are trying to exploit this as a political angle for the National Democratic Front (of the Philippines), Manny (Emmanuel) was a member of Bayan Muna, ‘tsaka sa labor din siya. So they are picking a political line here, which I hope that they will not use to pressure the prosecutors in the prosecuting of the case. We need good cases to file hindi naman pwede file tayo ng file ng kaso hindi mo naman kayang manalo,” siya nidugang.
Sa reklamo, si Asuncion niingon nga ang kapulisan nisulod sa ilang balay sa Cavite ug nipahigayon og raid nga walay gipakita nga search warrant.
Siya niingon nga sila nagsul-ob og mga ski mask, nga nakasampong aron di mailhan.
Matud ni Asuncion nga gibulag siya sa iyang bana hangtod nga nakadungog siya og buto sa armas human sa pipila ka minuto.
Ang pinuy-anan ni Asuncion usa lang sa daghang mga balay nga gironda sa kapulisan niadtong gabhiona.
Ang sagad nga sukaranan sa ronda mao nga sila mga sakop sa mga aktibistang grupo.
Matud sa kapulisan nga ang mga operasyon subay sa kampanya sa gobyerno, kaniadto ubos ni kanhi Presidente Rodrigo Duterte, batok sa loose firearms.
Gisalikway sa mga grupo sa tawhanong katungod ang pag-angkon sa kapulisan, ug niinsister nga ang mga operasyon konektado sa pamahayag nga gihimo ni Duterte, duha ka adlaw sa wala pa ang operasyon, alang sa kapulisan ug militar nga “patayon” ang mga rebeldeng komunista ug “ibaliwala ang tawhanong katungod.” / TPM sa SunStar Philippines