Sama sa gilauman, gilakip ang bag-ong naturalized player nga si Justin Brownlee sa 24-man Gilas Pilipinas pool diin birahon ang mga morepresentar sa Pilipinas alang sa katapusan ug 6th window sa 2023 FIBA World Cup Asian Qualifiers nga gikatakda sa sunod buwan sa Philippine Arena sa Bocaue, Bulacan.
Sa listahan nga gipagawas sa Samahang Basketbol ng Pilipinas (SBP) kagahapon, Enero 20, 2023, pangulohan ni Brownlee lakip na sa iyang mga kauban sa Brgy. Ginebra Gin Kings nga sila si Scottie Thompson, Jamie Malonzo, ug Japeth Aguilar ang national pool.
Gawas sa mga nangahisgutan, ang ubang mga magduduwa sa Philippine Basketball Association (PBA) nga naapil sa tapok mao sila si JuneMar Fajardo, CJ Perez, Chris Newsome, RR Pogoy, Calvin Oftana, Arvin Tolentino, ug Raymond Almazan.
Naa sab ang overseas players nga sila si Jordan Heading, Ray Parks, Dwight Ramos, Carl Tamayo, Kai Sotto ug ang magsuong sila si Kiefer ug Thirdy Ravena.
Ang bag-ong mga pangalan nga naapil sa grupo mao sila si Mason Amos, Jerome Lastimosa, Schonny Winston, Ange Kouame, Francis Lopez, ug Kevin Quiambao.
Sa final window, ang Gilas makigharong sa Lebanon karong Pebrero 24, 2023 ug Jordan karong Pebrero 27, 2023.