Gituman ni kanhi 5-division world boxing champion Floyd Mayweather Jr. ang iyang plano nga moaway og laing exhibition bout, ning higayuna sa United Kingdom.
Pinaagi sa social media, opisyal nga gianunsyo ni Mayweather nga makigharong siya ni kickboxer Liam Harrison karong Pebrero 25, 2023 sa O2 Arena sa London.
“London February 25th, It’s official. My first exhibition fight in the UK will be at the O2 Arena. Tickets go on sale next week. Stay Tuned,” pamahayag ni Mayweather nga napatik sa www.boxingscene.com.
Si Harrison, 37, kinsa naila sa Muay Thai nga The Hitman, adunay rekord nga 90-25-2, 50KOs.
Si Mayweather, 46, nirehistro og 50-0, 26KOs nga rekord una kini niretiro sa professional boxing niadtong 2017.
Pipila na sab ka exhibition bouts ang gisagubang ni Mayweather gikan sa iyang pagretiro diin lakip sa iyang mga nakontra mao sila si Logan Paul, Deji, ug Mikuru Asakura.
Gipasabot ni Mayweather nga nagtinguha siyang moaway sa UK gumikan kay wala pa siya nakapakita og askyon ning maong dapit dihang aktibo pa siya isip professional boxer.