Pito ka mga contingent sa dakbayan sa Sugbo pabantayan sa Cebu City Police Office (CCPO) og 28 ka police personnel sugod karon, Enero 21, 2023, hangtod mahuman ang Sinulog sa Carmen.
Matud ni Police Lieutenant Colonel Janette Rafter, deputy city director for operations sa CCPO, nga gimandoan sila ni Mayor Michael Rama nga padalhan og personnel ang mga contingent gikan sa dakbayan nga mosalmot sa Sinulog sa lungsod sa Carmen.
Sila ang mohatag sa security samtang naa sa billeting area ug samtang naa sa rota ang mga contingent.
Dunay lima ka contingents gikan sa dakbayan sa Sugbo, usa niini ang inila na kaayong Lumad Basakanon.
“Security sila sa billet kay kabalo ta nga naa silay mga gamit nga dalhon pud. So during the event, naa man guy uban nga mag billet, kanang matulog didto ang uban according sa ubang organizers, mohawa sila ugma puhon Sabado. Nya naa pud uban contingents nato nga sa Sunday na gyud sila. Kining uban moadto tanan sa schedule sa blocking nya ang mabilin sa ilang billeting area atong mga police,” matod ni Rafter.
Dugang ni Rafter nga ang 28 ka police personnel bahinon kini sa onse ka police station ug kadtong nadestino sa kampo sa CCPO.
Human sa ilang pasundayag sa Carmen, mobalik ra usab dayon sila sa ilang tagsatagsa ka police stations.
Samtang sa pagpangandam sa kapulisan sa probinsya sa Sugbo sa maong dakong kalihukan gahapon sa hapon gipahigayon ang walk through nga gipangulohan ni Police Colonel Romel Ochave.
Kini aron matino ang pagpatuman sa siguridad sanglit ilang napanglantawan nga dugokon sa mga turista ang ika 50 ka tuig nga Sinulog sa Carmen karong tuiga. (AYB)