Ipahigayon sa Cebu City Tourism Commission ang unang Red Lantern Festival sa dakbayan sa Sugbo karong Sabado, Enero 21, 2023, sa Plaza Sugbo sa dalan Magallanes isip pagsaulog sa Chinese New Year.
Si Konsehal Jocelyn Pesquera, sa usa ka press conference, nagkanayon nga una kini sa dakbayan sa Sugbo.
“We will be having a video of the history of our relations with China, as well as history of our Chinese Museums, and then we will also have like a kaning atoang mga Chinese New Year forecast,” matod ni Pesquera.
Ubay-ubay nga mga kalihukan ang nakalinya alang sa maong kalihukan, lakip na ang pag-abli sa Sugbu Chinese Heritage Museum ngadto sa publiko gikan sa alas-2 sa hapon hangtod alas 5:30 sa Sabado sa hapon, Enero 21. Wala kini bayad.
Ang mga dragon dance ipasundayag usab sa Magallanes St., nga sirhan gikan sa mga sakyanan.(Lahi nga estorya).
Gidayandayanan na og lanterns ingon man arko ang mao nga karsada.
Ang mga spotter ipakatap usab sa lugar aron susihon ang mga bisita nga adunay labing maayo nga gisul-ob nga sinina nga Intsek nga nailhan nga “cheongsam.”
Ang mga evaluator maoy mopili sa top eight, ug sa katapusan ang best dressed nga makadawat og P10,000 nga ganting salapi.
Si Konsehal Joel Garganera niingon nga tibuok dakbayan sa Sugbo ang selebrasyon, apan ang main event karong tuiga mao ang Red Lantern Festival.(Eiver Ky Villegas, USJ-R intern, Amper Campaña)