Ang Karapatan, cause-oriented group, niawhag sa Police Regional Office (PRO 7) nga likayan ang pagbasol sa duha ka mga aktibista nga nakasinati nga gidagit sa giingong mga ahente sa gobiyerno sa pier area sa dakbayan sa Sugbo sa Enero 10, 2023.
Sa usa ka pamahayag nga gi-post sa opisyal nga panid sa Facebook, ang tigpamaba sa Karapatan-Central Visayas nga si Dennis Abarrientos nikondenar sa kapulisan nga nibasol sa mga aktibista nga sila si Dyan Gumanao ug Armand Dayoha.
Si Abarrientos niingon nga si Lt. Col. Maria Theresa Macatangay, tigpamaba sa Cebu City Police Office (CCPO), nihagit sa duha ka mga aktibista nga motabang sa ilang imbestigasyon.
Matud ni Abarrientos, si Macatangay gikutlo nga nagkanayon “Unta dili pud sila maghilom-hilom kay sila ma’y gasugod ini.”
“It is ridiculous that police forces have now the gall to say this, when in fact, families and colleagues of the two victims sought their help way before they were rescued. This is clearly an attempt to redirect the public’s attention from the police, who were identified to be the captors,” dugang ni Abarrientos.
Matud ni Abarrientos nga ang duha ka mga biktima andam nga mokooperar sa imbestigasyon sa kapulisan.
Gisubli sa Karapatan-Central Visayas ang panawagan sa PRO 7 nga gamiton ang mga kahinguhaan niini sa paghimo og paspas ug patas nga imbestigasyon sa pagdagit, ilabina sa mga sakop sa kaugalingong kapulisan nga giila nga mga sad-an sa pagdagit.