Di tanang kaminyuon sama sa fairytales nga mga salida nga kanunay happy ang ending. Di kalikayan nga dunay maihap nga porsiyento sa mga nagtingang’ kaminyuon maong wa kalahutay sa gitinguhang forever.
Ang kaminyuon mahimong usa ka grasya o disgrasya dependi sa sitwasyon sa mga magtiayon. Kon ang pagbati ug huna-huna nga gitadlas naabot na sa katapusan sa dalan sa kaminyuon unya wa gihapoy nakitang kahayag, kalinaw ug alibyo, kining tanan timailhan nga paingon na sa panagbuwag.
Atong hisgutan karon ang mga simtomas sa nagsakit nga relasyon sa kaminyuon.
Pinaka-una ang pag-abuso sa kapikas di lang pisikal, kundi apil emotional, verbal ug financial. Kon kini mahitabo, dagan ug pangayo gilayon og tabang sa mga awtoridad sama sa Women’s Help Desk sa barangay, pulis, social workers o ospital para magihayan sa mga katungod ug maagapan sa insaktong hinabang.
Sunod ang kakuwang sa intimasiya. Di na gali magdulog inig katulog o lainlain na ang lawak-katulganan. Di na sab halos mag-kukabildo, samot ang halok.
Paglu-ib labi na kon tataw kaayong gibandilyo sa publiko iyang gikabuangang ikaduhang bathala unya mas gipalabi pa ang paghatag og importansiya o atiman kaysa pares nga gipakaslan ug gipaanakan.
Kanunay ug balik-balik nga panaway. Kon ang imong bana o asawa kanunay na lang manghimantay unya puro na lang sayop o bati iyang makita o isulti nimo , dilikado kini nga mopaingon sa sakit-sakit sa panglawas. Ang ending ini tumang ka stress o malisuan sa pangisip.
Lain sab ning financial problems labi na og palautang o bilmoko (bili mo ako) kaayo ang patner unya way klarong trabaho, o income ang banay. Paspas pa sa kilat ang pagpaguwa sa kwarta kaysa pagtigom sa panudlanan.
Sunod kining pagkamapahitas-anon. Di pa pilde unya magsegi na lang og lantugi. Ka kompetensiya kanunay ang pagtan-aw nila sa usag- usa maong magsegi og lalis imbis magpasensiyahay, magsabutay ug magsinabtanay.
Hangtod sa sunod Sabado. Pit Senyor!