Gihulipan sa San Miguel Beermen ang ilang multi-titled head coach nga si Leo Austria para sa Governor’s Cup sa Philippine Basketball Association.

Kini nahibaw-an dihang ang PBA ni post og slide show sa official line-up sa Beermen nga gipangulohan ni six-time PBA MVP June Mar Fajardo alang sa umaabot nga conference nga naglatid nga si assistant coach George Gallent ang magsilbing head coach sa SMB.

Sa maong slide slow, wala malatid ang katungdanan sa head coach sa Beermen sukad niadtong 2014 diin siya nakahakot og 9 ka kampyonato apil na ang karon nga season sa Philippine Cup.

Ang pagka-head coach ni Gallent dili na bag-o alang kaniya human siya nidumala sa makadiyot panahon sa Commissioner’s Cup human si Austria gipaubos sa health and safety protocols sa PBA.

Nasayran nga si Austria gihimo na diay karon nga consultant sa San Miguel sugod sa PBA Governor’s Cup.

Kini ang gikumpirma ni team manager Gee Abanilla human sa pormal nga pag-post sa line-up sa Beermen alang sa sunod conference.

Matod pa sa team manager nga nakighinabi na sa management si Austria kalabot sa iyang temporaryo nga pagbiya sa pag-coach.

“Coach Leo met with management a few days ago and informed us that he wishes to take a coaching sabbatical for personal reasons starting the Governors’ Cup. We respect his decision and we understand his situation as we fully support whatever he needs,” padayag ni Abanilla sa spin.ph

“With this development, he will remain with the team as a consultant and we have elevated Coach Jorge Gallent as the head coach. Coach Jorge will take over bringing with him PBA head coaching experience and an exciting future for the franchise,” dugang sa team manager.

Gipasalig niya ngadto sa SMB fans nga ilang ipadayon ang pagtrabaho para sa malampuson nga Governor’s Cup ug sa umaabot nga mga conference. (PAC)