Daghan ang naghinamhinam, ilabi na ang mga Cebuano fans, kalabot niadtong nabaniog nga pagbalik sa Sugboanong flashy pointguard nga si Mac Tallo sa PBA.
Kini human nga si coach Alden Ayo sa Converge Fiberxers sa PBA, sa usa ka interview, mipabuhagay nga aduna siyay umaabot nga “rock star” nga pointguard nga mao na lay kuwang sa iyang team aron makakombati sa ilang kampanya.
Wa man tuod siya molitok og ngan, apan sa iyang pasumbingay maklaro nga si Tallo, ang numero unong pambato sa Chooks 3X3 team, ang iyang gipasabot.
Tuod man, atong nakompirmar nga si Tallo gyud.
Si Tallo, ang no.1 3x3 player sa nasod, aduna pay live contract sa Chooks-to-Go ug aron makuha ang iyang serbisyo kinahanglan i-buy out ang iyang kontrata.
Mao kini ang gihimo sa Converge aron matuman ang ilang damgo.
Pero ang nahitabo hangtod karon wa pa gyuy katinuan kon mahinayon ba gyud og kuha si Tallo sa Converge gumikan kay gibalibaran kini sa management sa Chooks.
Two weeks ago, ang Converge nakadawat sa tubag sa Chooks sa ilang offer nga ilang i-buy out ang kontrata ni Tallo.
Gipasabot sa kampo sa Chooks nga wa sa ilang plano ang pag release ni Tallo (through buyout) kay ang Sugboanong basketbolista nalakip na sa ilang programa aron makasulod ang Chooks 3x3 team sa 2024 Paris Olympics.
Si Ronald Mascarinas, ang presidente sa Chooks, sa miaging tuig nibutyag nga ang Chooks-to-Go Philippine 3x3 team hataas na og rating sa world rankings ug dako ang iyang pagtuo nga makasulod kini sa cutoff sa mga mo-qualify unya alang sa Olympics.
Aron pagpatin-aw sa kasiguroan, ilang ipadayon ug palig-unon ang programa ilabi na karong tuiga aron mosaka pa og maayo ang points niini ug ang pagtipig ni Tallo maoy ilang gituohan nga makatabang og dako aron pagkab-ot sa ilang damgo.
So kon kini ang atong basihan, buot pasabot madelatar pa ang pagbalik ni Tallo sa PBA.
Apan usa sa atong tinubdan ang mibutyag nga wa mawad-i sa paglaom ang Converge ug hangtod karon padayon pa kining nakigsabotsabot sa Chooks.
We’ll see...