Grabe na gyud ka politicized ang mga tawo karon. Bisan gud sa Sinulog nga relihiyuso ug kulturanhong kalihukan, giawayan pa tungod sa pag-atras ni Gobernador Gwendolyn Garcia kay gipadayon ni Mayor Michael Rama ang kalihukan sa South Road Properties (SRP) nga gidali-dali sa pag-andam.
Naglalis ang mga ninglaban ni Rama ug Garcia kinsay sakto. Naangin pa ang Sr. Santo Niño. Karon kay Sinulog sa Carmen na sab, naa say mga netizen nga niingon nga uwanon ang dapit ug sama ra sab sa Cebu City, gidali-dali pag-andam ang dapit.
Gikan sa mga isyu sa bugas ngadto sa asukar, ang mga anti-Marcos nagpista sab niini. Ang mga supporter ni kanhi Bise Presidente Leni Robredo pwerteng makasaway sa matag higayon nga dunay mga palpak ang administrasyon.
Kon tan-awon og maayo ang social media, grabe ang lalis ug pagbugalbugal sa matag habig.
Ang social media nagdangilag sa nagkayo nang pulitikanhong pagdapig sa publiko. Misamot ang pagkabahin sa katawhan.
Duna guy managkabanay ug dugay na kaayong managhigala nga gisunog ang taytayan tungod sa pulitikanhong kasungian. Tungod lang sa pulitika, naguba ang relasyon. Unta, inay awayan ang mabaw kaayong mga butang, hisgutan ang mga pamaagi ug polisiya nga makasulbad sa problema sa nasod.
Magtanyag og mga pamaagi unsaon pagsulbad ang usa ka suliran inay nga general kaayo ang hisgutan ug nagpunting na sa personal kaayong panan-aw, inay sa sayop ug problema nga angay solusyonan.
Lisod tuohan nga bisan ang mga edukado nga netizens mosawom ug mosawsaw sa mabaw kaayong mga lalis. Duna guy ubang mga tawo nga wa na kaayo mag active social media tungod kay bati na kaayo ang ilang tan-aw sa palibot, puro na lang away ug uban pa.
Inay magamit sa maayong paagi isip behikulo ang social media alang sa interaksyon sa netizens, kadaghanan gihimo na kining dapit nga awayanan.