Lisod pa kaayo nga itanom sa huna-huna sa kadagkoan sa kagamhanan nga ilakip sa plano ang bike lanes ug pedestrian sidewalk. Nakahinumdom ko nga nanghambog kaniadto ang Dept. of Public Works and Highways (DPWH) nga sa ilang bag-ong mga karsada dunay one meter nga sidewalk dihang niapil sa mga tapok ang mga representante sa mga biking organization.

Apan kon tan-awon nimo ang bag-ong mga karsada, hagip-ot kaayo ang sidewalk. Naa pay gipasagdan sa mga local government unit (LGU) ang dapit nga gigamit nga tindahan.

Di sa pag-ingon, ang mga sidewalk vendor nga naay biseklita ug motorsiklo nga gigamit og guroy sa ilang mga stall bisan asa lang mohunong ug maninda. Di unta ni ingon ani apan nagkadaghan na ni dinhi sa Cebu City.

Ang gamay o karsada nga way sidewalk, mosamot nga way kaagian ang pedestrians.

Mao nang nakaingon ko nga maayo ang tumong ni Mayor Michael Rama nga Singapore-like, apan sa pulitikanhong sitwasyon karon ug sa nagkaguliyang nga karsada, tungason ang iyang panglantaw.

Unaha ang pagdisiplina, Mayor, sa imong mga tawo, dayon ang citizens. Kuhaa ang best people sa trabaho nga imong ipatrabaho nila. Ingon niana ang gibuhat ni anhing Prime Minister Lee Kuan Yew sa Singapore.

SALAMAT, MA'AM ARCE

Niadtong Sabado, atol sa foot procession, naiwas ko og pipila ka mga minutos sa pagsira sa mga karsada nga agian sa prosesyon. Busa, nanghangyo ko sa mga enforcer sa Cebu City Transportation Office (CCTO) nga makaagi ko kay motrabaho pa ko.

Gitulod ko ngadto sa eskina sa N. Bacalso ug P. del Rosario, apan sa kahuot sa trapiko ug katuyokon sa agianan, maabtan na ko sa pagsugod sa prosesyon.

Napugos ko og tawag kang Maam Raquel Arce nga duna pay meeting tali kang Mayor Rama. Ni chat na lang ko sa iyaha. Apan ang iyahang sakop nga akong giduol, wa nituo nga si Maam Raquel ang akong ka chat.

Dihang giingnan kong Maam Raquel sa pagtawag, iya kong gisultihan nga makig-estorya siya sa enforcer. Di pa unta dawaton sa enforcer kay nagtuo siyang nangatik ko. In short, bakakon ko.

Tuod man, napugos siya og estorya sa iyang boss. Gisultihan ko niya sa paglahos ug ako nay bahala sa mga pulis.

Sa pagpaila nako sa mga pulis, ila kong gipaagi, gitudloan asa agi ug gikuha pa nila ang barrier aron makaagi ko sa way daghang langas.

Sa sugod pa lang, bisan nipakita ko sa akong ID card ug nipasabot nganong importante nga makalusot ko, wa na siya maminaw. Wa kuno siyay labot kon makagawas o di ang amoang mantalaan. Di man to tinubagan og public servant.

Ikaduha na to nako nga kasinatian sa closure kay wa makaya sa pagdinali-dali kaniadto. But gipaagi ra ko sa traffic enforcer ug siya ang nipasabot sa ubang mga motorista. Nakasabot ra tawon ang ubang mga motorista nga part mi sa coverage sa mga kalihukan sa Sinulog.

Maayo unta kon ang mga bike patroller sa Sugbo Bike Lanes Board polite nga manakop. Di sama ato nga traffic enforcer.