Gihatagan sa Konseho sa Dakbayan sa Lapu-Lapu ang proponent sa 400 ka ektarya nga Mactan North Reclamation and Development Project (MNRDP) hangtod sa Martes, Enero 24, 2023, aron isumite ang tanang mga dokumento nga gikinahanglan sa pagpadayon sa pagtukod niini.
Si Lapu-Lapu City Councilor ug abogado Eugene Espedido, kinsa maoy chairman sa committee on business and industry, nitug-an sa SunStar Cebu nga si Dr. Noli Arnulfo Igano, presidente ug chief executive officer sa Salug Valley Enterprises and Development Corp. (SVEDC) Group, nihatag og lima ka calendar days para isumiter ang maong mga dokumento.
Kini, human giimbitar si Igano nga moatubang sa Sangguniang Panlungsod atol sa ilang regular session niadtong Miyerkules, Enero 18, aron mahatagan og katin-awan ang MNRDP.
Si Espedido niingon nga si Igano nipadayag sa iyang intensyon nga iduso ang maong proyekto.
“Mao to among giingnan nga og interesado man kaha ka, kumusta man kaha ang mga papeles nga imong gipang-submiter ug kondisyones nga madawat sa proyekto,” matud ni Espedido.
Gipasalig ni Igano sa Sangguniang Panlungsod nga kompleto na ang iyang mga dokumento nga gikatahong iyang gisumite ngadto kang manlalaban Michael Dignos, kinsa maoy nagdumala sa dakong proyekto sa miaging administrasyon.
Apan giangkon ni Espedido nga wala gi-turnover ni Dignos ang bisan unsang dokumento nga may kalabotan sa MNRDP sa dihang nilingkod si Chan isip mayor niadtong 2019.
Dugang pa niya nga makapamatuod niini ang Department of the Interior and Local Government (DILG) sanglit anaa sila atol sa turnover.
Hinuon, dili pa makompirmar ni Dignos kon nadawat ba niya ang mao nga mga dokumento ug wala na kini i-turn over sa kasamtangang administrasyon.
Si Espedido niingon nga ila nang gisusi ang reclamation project, nga nagtumbok nga si Lapu-Lapu City Mayor Junard “Ahong” Chan naghinam-hinam nga ipatuman ang maong proyekto sanglit dul-an sa 20 ka tuig nga walay kalambuan ang proyekto tungod sa mga kaso. (MKG)