Gibanabana sa Philippine Atmospheric, Geophysical and Astronomical Services Administration (Pagasa) dunay duha ngadto sa lima ka tropical cyclones sa unang tunga nga bahin sa 2023.
Hinuon, alang sa mga bulan sa Enero hangtod Pebrero, zero ngadto sa usa ka bagyo ang gitagna tungod kay ang panahon dili pa igo nga init alang sa tropical depressions, sumala sa Pagasa Davao chief meteorological officer Lolit Vilanay.
“Wala pa bagyo kasi masyado pang gamay. Ang mga low pressure area, wala nahimong bagyo. Kung naa man ma-develop, dili kusog. Dili siya mag-typhoon category,” matud ni Vilanay atol sa Kapihan sa PIA media forum sa miaging semana.
Sa Marso ug Abril, zero o usa ka bagyo ang gilauman sa duha ka bulan samtang usa ngadto sa duha ang gilauman sa Mayo ug Hunyo.
Matud ni Vilanay, ang katugnaw nga panahon nga nasinati sa miaging mga buwan tungod sa panahon sa tingtugnaw gikan sa Disyembre hangtod sa Pebrero sa amihanang bahin sa hemisphere nga nagdala sa Amihan o bugnaw nga hanging Amihan.
“Ang pinanggalingan sa hangin nga amihan, galing sa China nga moabot diri,”dason niya.
Sa laing bahin, si Vilanay niingon nga ang low-pressure area gipaabot mahimong tropical cyclone apan gamay ra ang posibilidad.
Matud ni Vilanay nga kinahanglang magbantay ang publiko sa mga pahimangno gikan sa Pagasa sa kusog nga pag-ulan ug pagpanugdog-kilat. (ICM, SunStar Davao)