Malampuson ang Sinulog 2023 nga gipahigayon niadtong miaging Enero 15 sa South Road Properties (SRP) sa siyudad sa Sugbo bisan pa kon nag-agi kini sa daghang mga pagsuway ug pagsaway.

Sumala sa Cebu City Disaster Risk Reduction and Management Office (CCDRRMO), kapin sa tunga sa milyon ka mga tawo ang nakasaksi niini.

Gibarugan ni Cebu City Mayor Mike Rama ang pagpahigayon sa Sinulog 2023 sa SRP bisan sa hulga sa uwan, lapukon nga venue ug way kapasilongan. Apan sa katapusan, miduyog ang panahon, mipakita ang adlaw, naaspalto ang venue ug nadayon gyud ang Sinulog 2023 sa SRP.

Ang tema sa Sinulog 2023 maoy “One Cebu Island Sinulog.” Apan kay wa man pasalmota ni Cebu Gov. Gwen Garcia ang contingents gikan sa lalawigan sa Sugbo, matawag na lang kadto nga “One-half Cebu Island Sinulog.”

Sagdi lang, kay sa nagkalain-laing mga sitio sa mga siyudad ug kalungsoran sa lalawigan sa Sugbo, gipahigayon usab ang ginagmay nga mga Sinulog sa managlahi ug gani samang petsa ning buwana agi og pasidungog ni Senyor Santo Niño.

Kagahapon, gipahigayon ang Sinulog sa Carmen. Miabot na diay sa ika-50 ka tuig ang Sinulog sa lungsod sa Carmen. Ang mga contingent sa lalawigan sa Sugbo nga wa makaapil sa Sinulog sa SRP, nakasalmot sa Sinulog sa Carmen.

Gipaabot sa organizers nga moabot usab sa tunga sa milyon ka mga tawo ang mosaksi sa Sinulog sa Carmen. Apan ang ilang oval adunay capacity alang sa 30,000 ka mga tawo, busa gipaabot nga mosulya ang mga tawo sa kadalanan.

Ang pagpahigayon sa mas dako nga Sinulog sa Carmen hayan maoy makapalambo sa turismo sa maong lungsod. Apan kuwang pa sa facilities ang maong lungsod. Busa, ang contingent sa siyudad sa Mandaue nagdala og mobile kitchen.

Dunay misugyot nga kon mahimong ipahigayon ang Sinulog sa lungsod sa Carmen, mahimo usab kining ipahigayon sa ubang mga lungsod ug mga siyudad sa lalawigan sa Sugbo. Mahimo kining kombinasyon sa Sinulog ug sa Suroy-Suroy Sugbo.

Mahimong maka-host og Sinulog kadtong mga lungsod ug mga siyudad nga nahimong host sa Palarong Pambansa kay duna man silay mga oval nga susama sa Cebu City Sports Center (CCSC). Magpaabot ta kon mahimo ba ang Suroy-Suroy Sinulog.